काठमाडौं । प्रधानमन्त्री वालेन्द्र शाहको आह्वानमा आज संवैधानिक परिषद्को बैठक बस्ने भएको छ । बैठक अपराह्न ५ बजे सिंहदरबारमा बस्ने तय गरिएको छ ।
संवैधानिक परिषद्का अध्यक्षसमेत रहेका प्रधानमन्त्री शाहको निर्देशनमा बोलाइएको बैठकमा सर्वोच्च अदालतको नयाँ प्रधानन्यायाधीश नियुक्तिका लागि सिफारिस सम्बन्धमा छलफल हुने जनाइएको छ ।
बैठकमा सभामुख डोलप्रसाद अर्याल, राष्ट्रिय सभाका अध्यक्ष नारायणप्रसाद दाहाल, कानुन, न्याय तथा संसदीय मामिलामन्त्री सोविता गौतम, प्रतिनिधिसभाका विपक्षी दलका नेता भीमराज आङ्देम्बे तथा प्रतिनिधिसभाकी उपसभामुख रुवी कुमारीलाई आमन्त्रण गरिएको छ ।
राष्ट्रपति रामचन्द्र पौडेलले मंगलबार संवैधानिक परिषद्सम्बन्धी अध्यादेश जारी गरेलगत्तै परिषद्को बैठक बोलाइएको हो ।
अध्यादेश जारी भएसँगै ६ सदस्यीय संवैधानिक परिषद्को बैठक बस्न आवश्यक गणपूरक संख्या चार कायम गरिएको छ । यस व्यवस्थाअनुसार परिषद्का तीन सदस्यको समर्थनमा निर्णय प्रक्रिया अघि बढाउन सकिने व्यवस्था गरिएको छ ।
यसअघि राष्ट्रपति पौडेलले सरकारले सिफारिस गरेको उक्त अध्यादेश पुनर्विचारका लागि फिर्ता पठाएका थिए । तर सरकारले कुनै संशोधन नगरी पुनः सिफारिस गरेपछि राष्ट्रपतिले अध्यादेश जारी गरेका हुन् ।
प्रतिक्रिया