संसदमा प्रधानमन्त्रीको अनुपस्थित विरुद्ध कांग्रेसको विरोध जारी रहने

काठमाडौं । प्रधानमन्त्री वालेन्द्र शाह प्रतिनिधिसभाको बैठकमा अनुपस्थित हुने भएपछि प्रमुख प्रतिपक्षी दल नेपाली कांग्रेसले संसदमा आफ्नो विरोधलाई निरन्तरता दिने स्पष्ट पारेको छ ।

बिहीबार प्रतिनिधिसभाको बैठकमा बोल्दै कांग्रेसका सचेतक निश्कल राईले प्रधानमन्त्री संसदप्रति उत्तरदायी हुनुपर्ने संवैधानिक व्यवस्था स्मरण गराउँदै उनको अनुपस्थितिप्रति आपत्ति जनाए । उनले संविधानको धारा ७६ को उपधारा १० अनुसार प्रधानमन्त्री संसदप्रति उत्तरदायी हुनुपर्ने स्पष्ट व्यवस्था रहेको उल्लेख गर्दै प्रधानमन्त्रीसँग सोध्नुपर्ने गम्भीर प्रश्नहरू अझै बाँकी रहेको बताए ।

प्रतिनिधिसभाको शून्य समयमा बोल्दै राईले संसदको गरिमा प्रधानमन्त्रीले नबुझेको टिप्पणी गरे । उनले संसदलाई ‘चिया चौतारी’ नभई ‘गुरुकुल’ र ‘विश्वविद्यालय’ जस्तो गम्भीर र मर्यादित संस्था भएको उल्लेख गर्दै प्रधानमन्त्रीले यस्तो संस्थालाई नै ‘बंक’ गर्न थालेको आरोप लगाए ।

‘सदन चिया चौतारी होइन, जहाँ मन लागे बस्ने, मन लागे जाने । सदन गुरुकुल हुनुपर्छ, विश्वविद्यालय हुनुपर्छ । तर प्रधानमन्त्रीले यही गुरुकुल र विश्वविद्यालय बंक गर्न थाल्नुभएको छ,’ राईले भने ।

उनले नीति तथा कार्यक्रम मुलुक निर्माणको महत्वपूर्ण दस्तावेज र मार्गचित्र भएको उल्लेख गर्दै त्यसबारे उठेका प्रश्नको जवाफ दिन प्रधानमन्त्री संसदमा उपस्थित नहुनु र प्रश्नबाट पन्छिन खोज्नु लोकतन्त्रका लागि सकारात्मक संकेत नभएको बताए ।

राईले प्रधानमन्त्री संसदमा उपस्थित नभएसम्म विपक्षी दलको विरोध जारी रहने स्पष्ट पारे ।