डोजर आतंक र जबर्जस्ती उठिबासविरुद्ध माइतीघरमा सुकुम्बासीहरूको प्रदर्शन

काठमाडौं । भूमिहीन सुकुम्बासी तथा अव्यवस्थित बसोबासीमाथि भइरहेको डोजर आतंक, जबर्जस्ती उठिबास र राज्य दमनको विरोध गर्दै काठमाडौंको माइतीघर मण्डलामा आज पनि प्रदर्शन भएको छ ।

संयुक्त राष्ट्रिय सुकुम्बासी मोर्चा नेपाल र अखिल नेपाल सुकुम्बासी सङ्घको नेतृत्वमा राजधानीको माइतीघर मण्डलामा खबरदारी प्रदर्शन भएको हो ।

विभिन्न स्थानका सुकुम्बासी बस्तीहरूमा बिना विकल्प डोजर चलाइएको, उचित पुनर्वासको व्यवस्था नगरिएको तथा राज्यबाट दमन भइरहेको भन्दै उनीहरूले विरोध गरेका छन् ।

प्रदर्शनमा सहभागीहरूले भूमिहीन सुकुम्बासी तथा अव्यवस्थित बसोबासीलाई क्षतिपूर्तिसहित उचित पुनर्वासको ग्यारेन्टी गर्न सरकारसँग माग गरेका छन्। उनीहरूले “बालेन सरकार चाहिँदैन, डोजर लाउन पाइँदैन”, “जबर्जस्ती उठिबास बन्द गर”, “डोजर आतंक बन्द गर”, “डोजर होइन, न्याय चलाऊ” लगायतका नारासहित प्लेकार्ड बोकेर विरोध जनाएका थिए।

मोर्चाले सुकुम्बासी बस्तीहरूमा कुनै वैकल्पिक व्यवस्था नगरी डोजर चलाउनु मानवअधिकारको गम्भीर उल्लंघन भएको उल्लेख गर्दै यस्तो कार्य तत्काल रोक्न सरकारलाई चेतावनी दिएको छ।

प्रदर्शनकारीहरूले भूमिहीन नागरिकको सम्मानजनक बसोबासको अधिकार सुनिश्चित गर्दै राज्यले संवाद, क्षतिपूर्ति र पुनर्वासको स्पष्ट नीति लागू गर्नुपर्ने माग गरेका छन्।