काठमाडौं । राष्ट्रिय स्वतन्त्र पार्टी (रास्वपा)ले आज देशभर वडा अधिवेशन गर्दैछ।
गत वैशाख २० गतेअघि तदर्थ समिति गठन भएका करिब १,५०० वडामा आइतबार अधिवेशन हुन लागेको हो।
पार्टीको सङ्गठन विभाग सचिव शंकर श्रेष्ठका अनुसार हालसम्म देशभर करिब ३,००० वडामा तदर्थ समिति गठन भइसकेका छन्। तीमध्ये करिब ५० प्रतिशत वडाको अधिवेशन निर्वाचनअघि र त्यसपछि सम्पन्न भइसकेको छ। तदर्थ समिति गठन भए पनि अधिवेशन हुन बाँकी रहेका वडाहरूको अधिवेशन आज हुनलागेको हो ।
रास्वपाले वडा अधिवेशन दुई चरणमा गर्ने निर्णय गरेको छ। यसअनुसार जेठ ३ गतेभित्र तदर्थ समिति गठन भएका वडाहरूमा जेठ १६ गते अधिवेशन गरिनेछ।
पालिका अधिवेशन पनि दुई चरणमा सञ्चालन हुनेछ। पार्टीले जेठ ९ र १७ गते पालिका अधिवेशन गर्ने कार्यतालिका तय गरेको छ। त्यस्तै, जेठ २३ र २४ गते जिल्ला अधिवेशन हुनेछ भने प्रदेश अधिवेशन जेठ २६ गतेदेखि सुरु भएर असार १ गतेसम्म सम्पन्न गर्ने तयारी गरिएको छ।
रास्वपाले कुनै पालिकामा कम्तीमा ३० प्रतिशत वडा अधिवेशन र जिल्लाको हकमा ३० प्रतिशत पालिका अधिवेशन सम्पन्न भएमा माथिल्लो तहको अधिवेशन नरोक्ने निर्णय गरेको जनाएको छ।
सबै तहको अधिवेशन सम्पन्न गरेपछि रास्वपाले आफ्नो प्रथम केन्द्रीय महाधिवेशन असार ७ देखि ९ गतेसम्म चितवन मा आयोजना गर्नेछ। पार्टी स्थापना भएको ठीक चार वर्ष पुगेकै अवसरमा पहिलो महाधिवेशन गर्न लागिएको हो।
प्रतिक्रिया