बुटवल । लुम्बिनी प्रादेशिक अस्पताल बुटवलको नवनियुक्त अस्पताल विकास समिति सदस्य उमादेवी ढकाल (कल्पना)ले मंगलबार पदभार ग्रहण गरेकी छन् । सो अवसरमा बोल्दै उनले अस्पतालमा आउने कुनै पनि सेवाग्राहीले स्वास्थ्य उपचारमा आफूलाई सुरक्षित महशुस गर्नेगरी वातावरण निर्माण गर्न बिकास समिति, अस्पताल प्रशासन, चिकित्सक तथा कर्मचारीहरुको सहकार्यलाई जोड दिइन् ।
अस्पतालसँग लाखौँ जनताको भरोसा र विश्वास जोडिएको बताउँदै उनले सोही अनुसार वातावरण निर्माणका लागि आफूले विकास समितिको सदस्यमा रहेर भूमिका निर्वाह गर्ने प्रतिवद्धता व्यक्त गरिन् । नवनियुक्त सदस्यलाई स्वागत गर्दै विकास समितिका अध्यक्ष अजयमान श्रेष्ठले अस्पतालप्रति जनअपेक्षा अत्याधिक रहेको बताउँदै त्यसलाई निरन्तरता र व्यवस्थापन जटिल बन्दै गएको उल्लेख गरे । अस्पतालको सेवा गुणस्तरलाई कायम राख्नका लागि पारदर्शी सहकार्यको आवश्यकतामा जोड दिए ।
अस्पतालका मेडिकल सुपेरिटेन्डेन डा। विष्णुप्रसाद गौतमले अस्पतालको गतिविधिलाई अधिकतम पारदर्शिता, उत्तरदायित्व र सहकार्यमा अघि बढाउन आफू प्रतिवद्ध रहेको उल्लेख गरे । यसका साथै जन अपेक्षा र अस्पतालमा प्राप्त सेवा सुविधा, जननशक्ति तथा प्रविधिहरुको सीमितता बारे पनि जनतालाई बुझाउन सक्नुपर्नेमा जोड दिए ।
लुम्बिनी प्रादेशिक अस्पतालमा दैनिक २ हजारदेखि २५ सय विरामी उपचारका लागि आउने गर्दछन् । यस अस्पतालमा वार्षिक चार लाख बढीले स्वास्थ्य सेवा लिने गरेको तथ्याङ्क छ । अस्पतालमा यसअघि अस्पताल विकास समितिको महिला सदस्य पदमा रहेकी लक्ष्मी भट्टराईको ३ वर्षे कार्यकाल पूरा भएपछि लुम्बिनी प्रदेश सरकारले ढकाललाई सदस्यमा नियुक्त गरेको हो । उनको कार्यकाल ३ वर्षको रहने कार्यविधि छ ।
प्रतिक्रिया