काठमाडौं । राष्ट्रिय स्वतन्त्र पार्टी (रास्वपा)ले आफ्नो पहिलो राष्ट्रिय महाधिवेशनको तयारीलाई तीव्रता दिँदै विस्तृत कार्यतालिका सार्वजनिक गरेको छ ।
पार्टीको केन्द्रीय निर्वाचन आयोगले जेठ ६ गतेको निर्णयअनुसार महाधिवेशन तयारीसँग सम्बन्धित साङ्गठनिक तथा निर्वाचन प्रक्रियाका विभिन्न चरणका कामहरूको समयसीमा निर्धारण गरेको हो ।
रास्वपाको पहिलो राष्ट्रिय महाधिवेशन आगामी असार ७, ८ र ९ गते चितवन मा आयोजना हुँदैछ ।
सार्वजनिक कार्यतालिकाअनुसार ७७ वटै जिल्ला र सातै प्रदेशमा निर्वाचन समिति गठन गर्ने कार्यलाई प्राथमिकता दिइएको छ । जेठ ७ गतेदेखि सुरु हुने उक्त प्रक्रिया जेठ १५ गतेभित्र सम्पन्न गरिसक्नुपर्नेछ । साथै, निर्वाचन समिति गठनसँग सम्बन्धित आधिकारिक परिपत्र तथा माइन्युटको प्रतिलिपि जेठ १० गतेभित्र निर्वाचन कार्यालयमा बुझाइसक्नुपर्ने व्यवस्था गरिएको छ ।
त्यसैगरी, स्थानीय तथा जिल्ला अधिवेशनका प्रतिवेदन संकलन गर्ने कार्य जेठ २० गतेसम्म सम्पन्न गरिनेछ भने महाधिवेशन प्रतिनिधिहरूको नामावली पेश गर्ने अन्तिम मिति जेठ २५ गतेसम्म तोकिएको छ । जिल्ला अधिवेशन तथा निर्वाचनसम्बन्धी प्रतिवेदन भने जेठ मसान्तभित्र अनिवार्य रूपमा पेश गर्नुपर्ने जनाइएको छ ।
कार्यतालिकामा प्रदेश अधिवेशनबाट निर्वाचित पदाधिकारीहरूको विवरण असार ५ गतेभित्र केन्द्रीय कार्यालयमा बुझाइसक्नुपर्ने उल्लेख गरिएको छ ।
महाधिवेशनलाई आधुनिक र प्रविधिमैत्री बनाउने उद्देश्यले रास्वपाले इलेक्ट्रोनिक भोटिङ मेसिन प्रयोगको तयारीसमेत अघि बढाएको छ । जेठ ७ गतेदेखि असार ५ गतेसम्म यससम्बन्धी छलफल, परीक्षण तथा आवश्यक तयारीका लागि समय छुट्याइएको निर्वाचन आयोगले जनाएको छ ।
केन्द्रीय निर्वाचन आयोगका उपप्रमुख राम गुरुङ द्वारा जारी सूचनामा सबै प्रदेश समितिका सभापतिहरूलाई आफ्नो प्रदेशअन्तर्गतका जिल्ला सभापतिहरूसँग आवश्यक समन्वय गरी कार्यतालिका अनुसार तोकिएको समयभित्र काम सम्पन्न गर्न निर्देशन दिइएको छ ।
महाधिवेशन तयारीलाई प्रभावकारी बनाउन पार्टीले महामन्त्रीद्वय कविन्द्र बुर्लाकोटी र भूपदेव शाह तथा संगठन विभागका सचिव शंकर श्रेष्ठ लाई समेत बोधार्थ दिँदै आन्तरिक परिचालनलाई तीव्र बनाएको जनाएको छ ।
प्रतिक्रिया