कपिलवस्तु । कपिलवस्तुमा यात्रुबहाक बस दुर्घटना हुँदा ३८ यात्रु घाइते भएका छन् ।
जिल्लाको महाराजगन्ज नगरपालिका-४ बरइपुरस्थित तौलिहवा-बहादुरगन्ज हुलाकी सडकखण्डमा मंगलबार बिहान यात्रुबाहक बस दुर्घटना हुँदा ३८ जना घाइते भएका हुन् ।
प्रहरीका अनुसार काठमाडौंबाट सुर्खेततर्फ जाँदै गरेको कर्णाली प्रदेश ०२-००१ ख १२६६ नम्बरको बस अनियन्त्रित भई सडकमा पल्टिएको हो। दुर्घटनापछि स्थानीय, प्रहरी र उद्धार टोलीको सहयोगमा घाइते यात्रुहरूको उद्धार गरी उपचारका लागि जिल्ला अस्पताल तौलिहवा पठाइएको थियो।
घाइतेमध्ये ३५ जनालाई थप उपचारका लागि भैरहवास्थित विभिन्न अस्पतालमा रिफर गरिएको प्रहरीले जनाएको छ। प्रहरीका अनुसार दुई जनाको अवस्था गम्भीर, १९ जनाको अवस्था मध्यम तथा १७ जनाको अवस्था सामान्य रहेको छ।
गम्भीर घाइते हुनेमा बर्दियाकी ४५ वर्षीया पवित्रा देवकोटा र सुर्खेतका ३० वर्षीय प्रकाश विक रहेका छन्। बस चालक सुर्खेतका ३० वर्षीय डिल्ली प्रसाद दाहाल, सहचालक राजन बुढासहित अधिकांश यात्रुहरूको शरीरका विभिन्न भागमा चोट लागेको प्रहरीले जनाएको छ।
दुर्घटनामा घाइते भएका यात्रुहरू सुर्खेत, दैलेख, कालिकोट, जुम्ला, बाँके, झापा, काठमाडौं, ललितपुर र ओखलढुंगालगायत जिल्लाका बासिन्दा रहेका छन्। प्रहरीका अनुसार १२ जना घाइतेलाई प्रहरीकै सवारी साधनमार्फत उद्धार गरिएको थियो भने अन्यलाई एम्बुलेन्समार्फत अस्पताल पुर्याइएको हो।
प्रतिक्रिया