काठमाडौं । राष्ट्रिय स्वतन्त्र पार्टी (रास्वपा) परित्याग गरी नेपाली कांग्रेस प्रवेश गरेकी ममता शर्मा लाई कांग्रेसले केन्द्रीय कार्यसमितिको सदस्य पदमा मनोनयन गरेको छ।
कांग्रेस सभापति गगनकुमार थापा ले कांग्रेसको विधान, २०१७ (संशोधनसहित)को धारा ४ को उपधारा ९(१०)(ङ) बमोजिम बाराकी शर्मालाई केन्द्रीय कार्यसमिति सदस्यमा मनोनयन गरेका हुन्। उक्त जानकारी कांग्रेसका कायममुकायम मुख्यसचिव कृष्णप्रसाद दुलालले दिएका छन्।
रास्वपा मधेश प्रदेशकी संस्थापक सभापतिसमेत रहेकी शर्माले पार्टीभित्र टिकट वितरणमा आर्थिक चलखेल भएको, विधि र प्रक्रिया मिचिएको तथा दाग लागेका नेताहरूको प्रभाव बढेको आरोप लगाउँदै रास्वपा परित्याग गरेकी थिइन्।
फागुन २१ गते निर्वाचनअघि जनकपुरधाममा आयोजित आमसभामार्फत उनी नेपाली कांग्रेसमा प्रवेश गरेकी थिइन्। सो अवसरमा सभापति थापाले उनलाई पार्टीमा स्वागत गरेका थिए।
प्रतिक्रिया