बुटवल । नेकपा एमालेका प्रभावशाली नेता तथा पूर्वअर्थमन्त्री सुरेन्द्र पाण्डेले पार्टीभित्र अब सामान्य सुधार (रिफर्म) मात्र पर्याप्त नभएको भन्दै आमूल रूपान्तरण (रिभोलुसन) आवश्यक रहेको बताएका छन् ।
प्रेस चौतारी नेपाल रूपन्देहीले बुधबार बुटवलमा आयोजना गरेको पत्रकार सम्मेलनमा बोल्दै नेता पाण्डेले पार्टी र राजनीतिको वर्तमान अवस्थाले एमालेलाई गहिरो आत्मसमीक्षा गर्न बाध्य बनाएको बताए। उनले पार्टीलाई नयाँ ढंगले पुनर्गठन गरी समयअनुकूल रूपान्तरण गर्नुपर्ने आवश्यकता औंल्याए ।
उनले अध्यक्ष केपी शर्मा ओलीको नाम उल्लेख गर्दै पार्टीको अवस्था, आफ्नो स्वास्थ्य, उमेर तथा पछिल्लो निर्वाचनको नतिजालगायतका विषयलाई गम्भीर रूपमा समीक्षा गरेर निर्णय लिनुपर्ने बताए ।
“अब अध्यक्ष केपी शर्मा ओलीले पार्टीको अवस्था, आफ्नो स्वास्थ्यको स्थिति, उमेर, चुनावमा प्राप्त नतिजासहित सबै पक्षलाई हेरेर विचार गर्नुपर्छ,” पाण्डेले भने, “पार्टी निर्माण गर्ने र माथि उठाउने विषय अहिले ठूलो चुनौती बनेको छ। चारैतिरबाट प्रश्न उठिरहेका छन् । पार्टीमा उपयुक्त र परिपक्व निर्णय हुन्छ भन्ने विश्वास छ ।”
उनले पार्टीलाई पुनर्जीवित बनाउन सबै नेता तथा कार्यकर्ताले व्यक्तिगत पद र जिम्मेवारीभन्दा माथि उठेर सोच्नुपर्ने धारणा राखे । “कसले पद छाड्ने भन्ने होइन, पार्टीलाई काँचुली फेर्न सबैले आवश्यक परे आफ्नो पद त्याग्न तयार हुनुपर्छ,” उनले भने ।
नेता पाण्डेले फागुनमा सम्पन्न निर्वाचनको परिणामले एमालेलाई स्पष्ट सन्देश दिएको उल्लेख गरे । कतिपय निर्वाचन क्षेत्रमा पार्टी सदस्य संख्या भन्दा कम मत प्राप्त भएको तथ्यले संगठनभित्र समस्या रहेको संकेत गरेको उनको भनाइ थियो ।
“२१ फागुनको निर्वाचन परिणामले एमालेलाई खबरदारी गरेको छ। केही क्षेत्रमा पार्टी सदस्यभन्दा कम मत आएको छ । यसले पार्टी सदस्यले समेत मतदान नगरेको अवस्था देखाउँछ,” उनले भने, “यस्ता संकेतले पार्टीभित्र समग्र पुनर्संरचनाको आवश्यकता देखिएको छ ।”
उनले एमालेलाई अब परम्परागत संरचनामा सीमित नराखी डिजिटल प्रविधिमैत्री संगठनका रूपमा विकास गर्नुपर्नेमा जोड दिए । “अब केवल भौतिक संरचनामा आधारित संगठनले पुग्दैन । डिजिटल पार्टी ट्रान्सफर्मेसन नगरी अघि बढ्न सकिँदैन,” उनले बताए ।
पाण्डेले पार्टी सचिवालयले रूपान्तरणका विषयमा कार्यदल गठन गरिसकेको उल्लेख गर्दै नेतृत्व तहमा पनि परिवर्तनको आवश्यकता महसुस हुन थालेको संकेत गरे । “अध्यक्षज्यूलाई पनि अब नयाँ ठाउँमा पुग्नैपर्छ भन्ने अनुभूति भएको होला,” उनले भने ।
प्रतिक्रिया