काठमाडौं । काठमाडौं महानगरपालिकाले ठमेल क्षेत्रभित्र सञ्चालनमा रहेका मसाज सेन्टर र स्पा केन्द्रहरूको अनुगमन गर्दै बाल यौन बेचबिखन तथा श्रम शोषण नियन्त्रण अभियानलाई तीव्र बनाएको छ ।
काठमाडौं महानगरपालिका-२६ को मानव बेचबिखन तथा ओसारपसार समितिले अनाहत नेपाल, नेपाल प्रहरी तथा महानगर प्रहरीसँगको सहकार्यमा बुधबार ठमेल क्षेत्रमा अनुगमन गरेको हो । अनुगमनका क्रममा केही स्पा तथा मसाज सेन्टरहरू दर्ताबिनै सञ्चालन भएको तथा आचारसंहिता विपरीत व्यवसाय सञ्चालन गरिएको पाइएको समितिले जनाएको छ ।
समितिका संयोजक शान्ता प्रजापतिका अनुसार वडा क्षेत्रमा सञ्चालित होटल, मसाज सेन्टर, स्पा, खाजाघर, लज तथा गेष्ट हाउसमा विभिन्न बहानामा १८ वर्षमुनिका बालबालिकालाई श्रममा लगाउने र यौन शोषणमा प्रयोग गर्ने गरिएको गुनासोपछि अनुगमनलाई तीव्रता दिइएको हो ।
उनले १८ वर्षमुनिका बालबालिकालाई जोखिमपूर्ण श्रम वा यौन व्यवसायमा संलग्न गराउनु कानुनविपरीत र दण्डनीय अपराध भएको स्पष्ट पारे । “यदि कसैले यस्तो कार्य गरेको पाइएमा मानव बेचबिखन तथा ओसारपसार (नियन्त्रण) ऐन तथा बालश्रम (निषेध तथा नियमित गर्ने) ऐनअनुसार कडा कानुनी कारबाही गरिनेछ,” उनले बताए ।
महानगरपालिकाले ठमेल क्षेत्रका मसाज तथा स्पा केन्द्रमा नियमित अनुगमन जारी राख्ने जनाएको छ । साथै, व्यवसायमा कार्यरत कर्मचारीको उमेर खुल्ने आधिकारिक परिचयपत्र अनिवार्य रूपमा राख्नुपर्ने, प्रत्येक व्यावसायिक स्थलमा ‘बालश्रम तथा यौन शोषण निषेध’ सम्बन्धी सचेतनामूलक बोर्ड राख्नुपर्ने व्यवस्था गरिएको छ ।
संयोजक प्रजापतिले बाल यौन बेचबिखन वा श्रम शोषण भएको जानकारी प्राप्त भएमा तत्काल वडा कार्यालय वा नजिकको प्रहरी कार्यालयमा सूचना दिन सर्वसाधारणलाई आग्रह गरेका छन् ।
उनले भने, “हाम्रो वडालाई बालमैत्री र सुरक्षित बनाउनु प्रमुख दायित्व हो । बालबालिकाको भविष्यसँग खेलबाड गर्ने जो-कोहीलाई पनि छुट दिइने छैन ।”
प्रतिक्रिया