तीनकुनेबाट विस्थापित सुकुम्बासी युवकको उपचारका क्रममा मृत्यु

काठमाडौं । काठमाडौंको तीनकुने-गैरीगाउँ क्षेत्रबाट विस्थापित भएका एक सुकुम्बासी युवकको उपचारका क्रममा मृत्यु भएको छ । मृत्यु हुनेमा ३६ वर्षीय भेषराज दर्जी रहेका छन् ।

उनी गत वैशाख १२ गते उक्त क्षेत्रबाट हटाइएका सुकुम्बासीमध्ये एक थिए । प्रधानमन्त्री बालेन्द्र शाह नेतृत्वको सरकारले वैशाख १२ गते तीनकुने-गैरीगाउँ क्षेत्रमा रहेका सुकुम्बासी बस्ती हटाएको थियो । सोही क्रममा विस्थापित भएका दर्जी त्यसयता कीर्तिपुरस्थित राधास्वामी सत्संगमा आश्रय लिएर बस्दै आएका थिए ।

वीर अस्पतालका अनुसार दर्जीलाई वैशाख १८ गते साँझ ७ बजेर १५ मिनेटमा अस्पताल भर्ना गरिएको थियो । उनको स्वास्थ्य अवस्था जटिल बनेपछि भेन्टिलेटरमा राखेर उपचार गरिएको थियो ।

लामो समयसम्म उपचार जारी राखिए पनि स्वास्थ्यमा सुधार नआएपछि बिहीबार दिउँसो ४ बजेर २६ मिनेटमा चिकित्सकले उनलाई मृत घोषणा गरेका हुन् । यसअघि पनि उक्त सुकुम्बासी बस्तीका दुई जनाले आत्महत्या गरेको घटना सार्वजनिक भएको थियो । पछिल्लो घटनासँगै विस्थापित सुकुम्बासीहरूको अवस्था र पुनःस्थापनाको विषय फेरि चर्चामा आएको छ ।