काठमाडौं । नेकपा एमालेले जेनजी आन्दोलनसम्बन्धी राष्ट्रिय मानवअधिकार आयोगले सार्वजनिक गरेको प्रतिवेदनप्रति गम्भीर असहमति जनाउँदै आवश्यक परे अदालत जाने चेतावनी दिएको छ ।
एमाले महासचिव शङ्कर पोखरेलले शुक्रबार जारी गरेको विज्ञप्तिमा भदौ २३ र २४ गते भएका घटनाका विषयमा आयोगले तयार पारेको प्रतिवेदन पूर्वाग्रही, बदनियतपूर्ण तथा षड्यन्त्रमूलक रहेको दाबी गरेका छन् ।
एमालेले प्रतिवेदनमाथि पुनरावलोकन गर्न आयोगलाई आग्रह गर्ने निर्णय गरेको जनाएको छ । विज्ञप्तिमा विधिको शासन, संविधान र लोकतान्त्रिक मूल्यमान्यताको संरक्षणलाई केन्द्रमा राखेर आगामी रणनीति तय गरिने उल्लेख गरिएको छ ।
पार्टीले मुलुकमा विकसित राजनीतिक, संवैधानिक तथा लोकतान्त्रिक विषयमा विभिन्न राजनीतिक दल र सरोकारवालासँग संवाद तथा सहकार्य गर्दै साझा धारणा निर्माणका लागि वातावरण बनाउने पनि जनाएको छ ।
त्यस्तै, प्रतिवेदनबाट प्रभावित पक्षको तर्फबाट आयोगसमक्ष आपत्ति तथा पुनरावलोकनको माग गर्ने, संवैधानिक प्रश्न उठेमा न्यायिक पुनरावलोकनका लागि अदालत जाने र आवश्यक परे कानुनी उपचारका सबै विकल्प प्रयोग गर्ने एमालेको भनाइ छ ।
प्रतिक्रिया