काठमाडौं । राष्ट्रिय स्वतन्त्र पार्टी (रास्वपा) को जिल्ला अधिवेशन आजदेखि देशभर सुरु हुँदैछ । पार्टीले ७७ वटै जिल्लामा तदर्थ समिति गठन गरिसकेको छ भने पछिल्लो पटक डोल्पामा तदर्थ समिति गठन गरिएको थियो ।
यद्यपि गण्डकी प्रदेशका हिमाली जिल्ला मनाङ र मुस्ताङमा भने यसपटक जिल्ला अधिवेशन नहुने भएको छ । ती जिल्लामा वडा तथा पालिका अधिवेशनसमेत सम्पन्न नभएकाले जिल्ला अधिवेशन नगरिने पार्टीले जनाएको छ ।
रास्वपाले कम्तीमा ३० प्रतिशत पालिकाको अधिवेशन सम्पन्न भएका जिल्लामा जिल्ला अधिवेशन गर्न सकिने व्यवस्था गरेको थियो । सोही आधारमा अधिकांश जिल्लामा अधिवेशन प्रक्रिया अघि बढाइएको हो ।
पार्टीको कार्यतालिकाअनुसार आज र भोलि जिल्ला अधिवेशन सम्पन्न गरिनेछ । त्यसपछि जेठ २६ गतेदेखि असार १ गतेसम्म प्रदेश अधिवेशन सञ्चालन हुनेछ ।
रास्वपाको प्रथम राष्ट्रिय महाधिवेशन असार ७ देखि ९ गतेसम्म चितवनमा आयोजना गर्ने तयारी गरिएको छ । महाधिवेशनले पार्टीको भावी नेतृत्व तथा संगठनात्मक संरचनाबारे महत्वपूर्ण निर्णय गर्ने अपेक्षा गरिएको छ ।
प्रतिक्रिया