नेपालगन्ज । विद्यालयको जग्गा अतिक्रमण हटाउन गएको टोलिका एक प्रहरी हवल्दारलाई अतिक्रमण गरेर बसिरहेकी एक महिलाले धारिलो हतियार प्रहार गरेकी छन् । बाँकेको बैजनाथ गाँउपालिकाको इश्वरी माध्यामिक विद्यालयको अतिक्रमित जग्गा खाली गराउन पुगेको टोलीका प्रहरी हवल्दार सुनिल चौधरीमाथि अतिक्रमण गरेर बसिरहेकी साबित्रीकुमारी शाहीले धारिलो हतियारले प्रहार गरेकी हुन् ।
हतियार प्रहारबाट हवल्दार चौधरी सामान्य घाइते भएको बाँके प्रहरी प्रवक्ता नायव प्रहरी उपरीक्षक प्रतितसिंह राठौरले बताए । ‘एकजना हवल्दारमाथि धारिलो हतियार प्रहार भएको रहेछ, घाउचोट छैन सामान्य निलडाम मात्र बसेको छ, सामान्य अवस्था छ,’ उनले भने, ‘धारिलो हतियार प्रहार गर्ने महिलालाई पक्राउ गरेका छौं ।’
लामो समयदेखि विद्यालयको जग्गामा बसोबास गरिरहेकाहरुलाई जग्गा खाली गर्न विद्यालयको तर्फबाट पूर्व सूचना दिँदा पनि खालि नगरेपछि आज प्रहरीको सहयोगमा अतिक्रमण हटाउन थालिएको थियो ।
पक्राउ परेकी शाहीले भने आफुमाथि आक्रमण गर्न आएपछि प्रतिआक्रमण गरेको बताएकी छन् । उनले घरभित्रै पसेर आफुमाथि आक्रमण गरिएपछि प्रतिआक्रमण गरेको बताइन् । गासबास नै उठाउन आएपछि भएको प्रतिरोधलाई स्वाभाविक भन्दै आफुले आत्मरक्षाकालागि आक्रमण गरेको बताइन् ।
प्रतिक्रिया