सुनचाँदीको मूल्य आज पनि बढ्यो, तोलामा कति ?

काठमाडौं । नेपाली बजारमा आइतबार पनि सुनचाँदीको मूल्यमा वृद्धि भएको छ। अन्तर्राष्ट्रिय बजारमा सुनको मूल्य बढिरहेकाले त्यसको प्रभाव स्वदेशी बजारमा पनि देखिएको हो।

नेपाल सुनचाँदी व्यवसायी महासंघका अनुसार आइतबार छापावाल सुनको मूल्य प्रतितोला १ हजार २०० रुपैयाँले बढेर २ लाख ९२ हजार २०० रुपैयाँ पुगेको छ। शुक्रबार सुन प्रतितोला २ लाख ९१ हजार रुपैयाँमा कारोबार भएको थियो।

यसअघि शुक्रबार मात्रै सुनको मूल्य एकै दिन प्रतितोला ५ हजार ३०० रुपैयाँले उकालो लागेको थियो।

चाँदीको मूल्य पनि बढेको छ। शुक्रबार प्रतितोला ४ हजार ८४० रुपैयाँमा कारोबार भएको चाँदी आइतबार ५५ रुपैयाँले बढेर ४ हजार ८९५ रुपैयाँ पुगेको महासंघले जनाएको छ।

अन्तर्राष्ट्रिय बजारमा सुनको मूल्य प्रतिऔंस ४ हजार २११ अमेरिकी डलर हाराहारीमा कारोबार भइरहेको छ। विश्व बजारमा सुनको मूल्य वृद्धिसँगै नेपाली बजारमा पनि सुनचाँदीको भाउ लगातार उकालो लागिरहेको छ।