काठमाडौं । फिफा विश्वकपको समूह चरणअन्तर्गत दोस्रो खेलमा नवप्रवेशी केपभर्डेले दुईपटकको विश्वविजेता उरुग्वेविरुद्ध उत्कृष्ट प्रदर्शन गर्दै २-२ को बराबरी खेलेको छ।
विश्व फुटबलको शक्तिशाली टोली मानिने उरुग्वे सन् १९३० र १९५० मा विश्वकप विजेता बनेको थियो । यता, केपभर्डे भने पहिलोपटक विश्वकप खेलिरहेको राष्ट्र हो । तर प्रतियोगितामा उसले लगातार प्रभावशाली प्रदर्शन गरिरहेको छ ।
खेलमा केपभर्डेका केभिन पियानले पहिलो गोल गर्दै टोलीलाई अग्रता दिलाएका थिए । त्यसको केही समयपछि उरुग्वेका मेक्सी अराजाओले गोल फर्काउँदै खेललाई बराबरीमा ल्याए । पहिलो हाफको इन्जुरी समयमा अगस्टिन क्यानोबियोले गोल गरेपछि उरुग्वे २-१ ले अघि बढेको थियो ।
तर दोस्रो हाफमा केपभर्डेले पुनः सशक्त पुनरागमन गर्यो । खेलको ६०औँ मिनेटमा हेलियो भरेलोले गोल गर्दै खेललाई २-२ को बराबरीमा पुर्याए । त्यसपछि दुवै टोलीले थप गोल गर्न नसक्दा अंक बाँड्न बाध्य भए ।
यसअघि विश्वविजेता स्पेनसँग गोलरहित बराबरी खेलेको केपभर्डेले विश्वकपमा पहिलो गोलसमेत यही खेलमा दर्ता गरेको हो । बराबरीसँगै दुवै टोलीले अंक तालिकामा एक–एक अंक थप्दै कुल २–२ अंक पुर्याएका छन् ।
प्रतिक्रिया