काठमाडौं । भेनेजुएलाको राजधानी काराकास आसपास क्षेत्रमा केही सेकेन्डको अन्तरालमा दुई शक्तिशाली भूकम्प गएपछि ठूलो जनधनको क्षति भएको आशंका गरिएको छ । अमेरिकी भूगर्भ सर्वेक्षण (यूएसजीएस)ले भूकम्पबाट मृत्यु हुनेको संख्या १० हजार नाघ्न सक्ने प्रारम्भिक अनुमान सार्वजनिक गरेको छ ।
बुधबार राति गएको ७.२ र ७.५ म्याग्निच्युडका भूकम्पले पश्चिमी भेनेजुएलामा व्यापक क्षति पुर्याएको जनाइएको छ । भूकम्पका कारण कैयौँ भवनहरू भत्किएका छन् भने हजारौँ नागरिक सुरक्षित स्थानतर्फ पलायन भएका छन् ।
भेनेजुएलाका गृहमन्त्री डीओसडाडो काबेलोले नागरिकलाई घर तथा जोखिमयुक्त संरचना तत्काल खाली गर्न आग्रह गरेका छन् । राष्ट्रिय बिदाको दिन अधिकांश मानिस घरमै रहेका कारण मानवीय क्षति उच्च हुन सक्ने अनुमान गरिएको छ ।
यूएसजीएसका अनुसार पहिलो भूकम्प काराकासबाट करिब २८४ किलोमिटर पश्चिममा पर्ने सान फेलिप क्षेत्र नजिक ७.२ म्याग्निच्युडको थियो । त्यसको केही समयपछि राजधानीबाट करिब २९३ किलोमिटर पश्चिममा रहेको युमारे क्षेत्र नजिक ७.५ म्याग्निच्युडको दोस्रो शक्तिशाली भूकम्प गएको थियो ।
उद्धार तथा राहत कार्य जारी रहेको छ भने क्षतिको यथार्थ विवरण आउन बाँकी रहेको अधिकारीहरूले बताएका छन् ।
प्रतिक्रिया