ओली, प्रचण्ड, माधवले आज एउटै मञ्चबाट भाषण गर्दै

काठमाडौं । नेकपा एमालेका अध्यक्ष केपी शर्मा ओली, नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’सहित विभिन्न राजनीतिक दलका शीर्ष नेताहरू आज राजधानीमा एउटै मञ्चमा सहभागी हुँदैछन् ।

मदन भण्डारी फाउण्डेसनले जननेता मदन भण्डारीको ७५ औँ जन्मजयन्तीका अवसरमा राष्ट्रिय सभागृहमा आयोजना गरेको ‘नेपालको कम्युनिष्ट आन्दोलन र जननेता मदन भण्डारी’ विषयक राष्ट्रिय गोष्ठीमा पूर्वराष्ट्रपति विद्यादेवी भण्डारी प्रमुख अतिथिका रूपमा सहभागी हुने कार्यक्रम रहेको छ ।

कार्यक्रममा एमाले अध्यक्ष ओली, नेकपा संयोजक प्रचण्ड, नेकपा (एकीकृत समाजवादी) का अध्यक्ष माधवकुमार नेपाल तथा पूर्वप्रधानमन्त्री झलनाथ खनालले पनि सम्बोधन गर्ने कार्यतालिका छ ।

पछिल्लो समय ओली र प्रचण्डबीच राजनीतिक संवाद र निकटता बढिरहेको चर्चा चलिरहेका बेला प्रमुख कम्युनिष्ट नेताहरूको एउटै मञ्चमा हुने उपस्थितिलाई राजनीतिक रूपमा अर्थपूर्ण रूपमा हेरिएको छ ।