काठमाडौं । अर्जेन्टिनाका कप्तान लियोनेल मेसीले फिफा विश्वकप इतिहासमा अर्को ऐतिहासिक कीर्तिमान आफ्नो नाममा दर्ज गरेका छन् । केप भर्डेविरुद्धको अन्तिम १६ प्रवेशका लागि भएको खेलमा गोल गर्दै उनले विश्वकपका लगातार आठ खेलमा गोल गर्ने पहिलो खेलाडी बन्ने दुर्लभ उपलब्धि हासिल गरेका हुन् ।
मेसीको यो ऐतिहासिक गोल शृंखला सन् २०२२ को विश्वकपबाट सुरु भएको हो। उनले त्यस संस्करणमा अष्ट्रेलियाविरुद्ध गोल गरेपछि नेदरल्यान्ड्सविरुद्ध एक गोल र एक असिस्ट, क्रोएसियाविरुद्ध एक गोल र एक असिस्ट तथा फाइनलमा फ्रान्सविरुद्ध दुई गोल गर्दै अर्जेन्टिनालाई विश्वकप उपाधि दिलाउन महत्वपूर्ण भूमिका खेलेका थिए ।
सन् २०२६ को विश्वकपमा पनि मेसीको उत्कृष्ट लय कायम रह्यो। उनले अल्जेरियाविरुद्ध ह्याट्रिक गरे भने अष्ट्रियाविरुद्ध दुई गोल, जोर्डनविरुद्ध एक गोल र केप भर्डेविरुद्ध पनि गोल गर्दै विश्वकपका लगातार आठ खेलमा गोल गर्ने विश्वकै पहिलो फुटबलर बने ।
केप भर्डेविरुद्धको गोलसँगै मेसीले विश्वकपमा आफ्नो व्यक्तिगत २० औँ गोल पूरा गरेका छन् । साथै, उनी जारी विश्वकपको गोल्डेन बुट दौडमा पनि अग्रस्थानमा उक्लिएका छन् ।
३९ वर्षीय मेसीले उमेर केवल सङ्ख्या मात्र भएको प्रमाणित गर्दै विश्व फुटबलमा लगातार नयाँ कीर्तिमान थपिरहेका छन् । लगातार आठ विश्वकप खेलमा गोल गर्ने उनको उपलब्धिलाई आधुनिक फुटबल इतिहासकै दुर्लभ र उत्कृष्ट व्यक्तिगत कीर्तिमानमध्ये एकका रूपमा हेरिएको छ ।
विश्वकपमा अर्जेन्टिनाको सफल यात्रासँगै मेसीले व्यक्तिगत रूपमा पनि नयाँ इतिहास रचिरहेका छन् । उनका लगातार उत्कृष्ट प्रदर्शनले अर्जेन्टिनालाई उपाधि रक्षा अभियानमा थप बलियो दाबेदारका रूपमा स्थापित गरेको छ ।
प्रतिक्रिया