काठमाडौं । दैलेखको चामुण्डा बिन्द्रासैनी नगरपालिका–७ साङ्गेताडास्थित कर्णाली नदीमा खसेको गाडी र यात्रुको खोजीका लागि सशस्त्र प्रहरी बल नेपालले विशेष उपकरणसहित थप गोताखोर टोली परिचालन गरेको छ ।
सशस्त्र प्रहरी बल नेपालको विपद् व्यवस्थापन तालिम शिक्षालय, कुरिनटारबाट सशस्त्र प्रहरी निरीक्षक प्रेमबहादुर तामाङको कमाण्डमा चार सदस्यीय गोताखोर टोली घटनास्थलतर्फ पठाइएको हो । टोलीले शनिबारदेखि खोजी कार्यमा सहभागी हुने जनाइएको छ ।
टोलीसँग पानीमुनि तथा तीव्र बहावमा रहेका वस्तु र सवारीसाधन पहिचान गर्न प्रयोग हुने सोनार क्यामरा, म्याग्नेट लगायतका विशेष उपकरणहरू रहेका छन् । ती उपकरणको सहयोगमा नदीको गहिराइमा बेपत्ता गाडी तथा यात्रुको खोजी गरिनेछ ।
गत बिहीबार सुर्खेतबाट कालीकोटतर्फ जाँदै गरेको कर्णाली प्रदेश ०२-००१ ख १०५५ नम्बरको फोर्स गाडी सडकबाट करिब ६-७ सय मिटर तल कर्णाली नदीमा खसेको थियो ।
घटनापछि तत्कालै परिचालन गरिएको टोलीले भिरमा अड्किएको अवस्थामा एक पुरुषको शव फेला पारेको थियो । तर गाडी र अन्य यात्रुको अवस्था अझै अज्ञात रहेकाले खोजी कार्य जारी रहेको प्रहरीले जनाएको छ ।
प्रतिक्रिया