काठमाडौं । नेपाल बाल संगठन (बालमन्दिर)को जग्गा लिजमा दिइएको विषयसँग सम्बन्धित विवादमा प्रहरीले तीन जनालाई पक्राउ गरेको छ।
प्रहरीको केन्द्रीय अनुसन्धान ब्युरो (सीआईबी)ले बिहीबार काठमाडौंका विभिन्न स्थानबाट आशा श्रेष्ठसहित तीन जनालाई नियन्त्रणमा लिएको हो। पक्राउ परेका व्यक्तिहरूमाथि जग्गा लिज प्रक्रियामा उनीहरूको संलग्नता र भूमिकाबारे विस्तृत अनुसन्धान भइरहेको प्रहरीले जनाएको छ।
सीआईबीका एसएसपी अनुपमशम्शेर जबराका अनुसार पक्राउ परेका व्यक्तिहरूमाथि आवश्यक कानुनी प्रक्रिया अघि बढाइएको छ। बालमन्दिरको जग्गा लिजमा दिँदा भएको निर्णय प्रक्रिया, त्यससँग जोडिएका कागजात तथा सम्बन्धित पक्षहरूको भूमिकालाई केन्द्रमा राखेर अनुसन्धान अगाडि बढाइएको उनले बताए।
बालमन्दिरको जग्गा लिजसम्बन्धी विषय लामो समयदेखि विवादमा रहँदै आएको छ। यस प्रकरणमा यसअघि पनि विभिन्न निकायबाट छानबिन र अनुसन्धान हुँदै आएको थियो।
प्रतिक्रिया