बुटवल । बुटवल उपमहानगरपालिकाले वायु प्रदूषण व्यवस्थापन योजना (एयर क्वालिटी म्यानेजमेन्ट प्लान-एक्यूएमपी) को प्रारम्भिक मस्यौदामाथि सरोकारवालासँग छलफल तथा अन्तरक्रिया गरेको छ । जनप्रतिनिधि, कर्मचारी तथा टोल विकास संस्थाका प्रतिनिधिहरूको सहभागितामा आइतबार आयोजित कार्यशालामा वायु गुणस्तर सुधार र व्यवस्थापनका उपायबारे सुझाव संकलन गरिएको हो ।
स्वास्थ्य प्रणाली सुदृढीकरण, घरायसी व्यवहार परिवर्तन तथा स्वच्छ हावा प्रवर्द्धन गर्ने उद्देश्यले बुटवल उपमहानगरपालिकाले सेतो गुराँस बाल विकास केन्द्रसँगको सहकार्यमा वायु प्रदूषण रोकथाम तथा न्यूनीकरणसम्बन्धी कार्यक्रम सञ्चालन गर्दै आएको छ ।
कार्यक्रममा बुटवल उपमहानगरपालिकाकी प्रमुख सावित्रा अर्यालले वायु प्रदूषण नियन्त्रणका लागि जनचेतनाको विकास आवश्यक रहेको बताइन् । व्यवहार परिवर्तन र नीतिगत सुधारलाई सँगसँगै अघि बढाएर बुटवलवासीलाई स्वच्छ वातावरण र गुणस्तरीय स्वास्थ्य सेवा उपलब्ध गराउने लक्ष्य रहेको उनले उल्लेख गरिन् ।
प्रमुख प्रशासकीय अधिकृत दीपक ज्ञवालीले कार्यशालामा प्राप्त सुझावलाई योजनाको मस्यौदामा समावेश गरिने बताए। उनले स्वच्छ हावा सुनिश्चित गर्न स्थानीय तह मात्र नभई नागरिकको समेत सक्रिय सहयोग आवश्यक रहेको धारणा राखे ।
कार्यक्रममा सहभागीहरूले घरायसी तथा सामुदायिक स्तरमा स्वच्छ चुलो प्रविधिको प्रयोग विस्तार गर्नुपर्ने, पुराना सवारीसाधन विस्थापन गर्नुपर्ने, विद्युतीय ब्याट्रीको सुरक्षित व्यवस्थापन गर्नुपर्ने तथा धुवाँजन्य प्रदूषण नियन्त्रणका प्रभावकारी उपाय अवलम्बन गर्नुपर्ने सुझाव दिएका थिए ।
बुटवल उपमहानगरपालिकाका स्वास्थ्य शाखा प्रमुख युवराज पाण्डेले रुपन्देहीमा वायु प्रदूषणको अवस्था चिन्ताजनक रहेको बताए । उनका अनुसार घरभित्र दाउरा र गुइँठाको प्रयोगबाट उत्पन्न हुने धुवाँ, उद्योग तथा कलकारखानाबाट निस्कने प्रदूषण, इन्धनबाट चल्ने सवारीसाधनको उत्सर्जन, फोहोर जलाउने प्रवृत्ति, डढेलो तथा धुलो-धुवाँका कारण वायु प्रदूषण बढ्दै गएको छ ।
कार्यक्रममा वडा नम्बर १७ का अध्यक्ष ज्ञानप्रसाद रेश्मीले वायु प्रदूषण बढिरहेको अवस्थामा सञ्चालन गरिएको यस्तो कार्यक्रम महिला र बालबालिकामात्र नभई सम्पूर्ण नागरिकका लागि उपयोगी हुने बताए । उनले वातावरण संरक्षण र स्वच्छ हावा सुनिश्चित गर्ने अभियानमा स्थानीय जनप्रतिनिधिको पूर्ण सहयोग रहने प्रतिबद्धता व्यक्त गरे ।
प्रतिक्रिया