नेपालगन्ज । बाँकेको नेपालगन्जमा आदिकवि भानुभक्त आचार्य को २१३ औं जन्मजयन्ती मनाइएको छ । महेन्द्र पुस्तकालय, भानुभक्त चोक संरक्षण तथा ब्यबस्थापन समिति र भेरी साहित्य समाज नेपालगन्जको संयुक्त आयोजनामा नेपालगन्जमा भानु जयन्ती मनाइएको हो ।
महेन्द्र पुस्तकालयको सभाहलमा आयोजित जन्म जयन्ती समारोहमा बोल्दै लुम्बिनी प्रदेशका आन्तरिक मामिला तथा कानुन मन्त्री भन्डारीलाल यादवले समाजमा सबैले केही न केही सकारात्मक योगदान गर्न आवस्यक रहेको र सत्कर्मबाट मात्रै जीवन सार्थक हुने धारणा व्यक्त गरे ।
समारोहका बीच लामो समय देखि साहित्य साधनामा अनवरत क्रियाशिल दुई साहित्यकार सनत रेग्मी र बिष्णुलाल कुम्हाललाई नागरिक अभिनन्दन गरिएको थियो । सम्मानित ब्यक्तित्वहरुलाई मन्त्री यादवसहित आयोजक सस्थाका अध्यक्षहरु कृष्ण प्रसाद श्रेष्ठ, ईन्द्रबहादुर बस्नेत, बलराम यादव, लुम्बिनी प्रदेशसभा सदस्य द्वय मिना श्रेष्ठ, अम्बिका काफ्ले लगायतले दोसल्ला, माला र सम्मान पत्र मार्फत सम्मान गरिएको थियो ।
समारोह सुरु हुनु अघि भानुभक्त चौक न्युरोड नेपालगन्जमा रहेको भानुभक्तको शालिकमा माल्यार्पण गरि त्रीवेणी मोड, त्रिभुवन चौक हुँदै महेन्द्र पुस्तकालय सम्म प्रभातफेरी गरिएको थियो ।
कार्यक्रममा डाक्टर हरि तिमिल्सिनाले भानुभक्तको योगदान बिषयमा चर्चा गरेका थिए भने सम्मानित साहित्यकारद्व्य सनत रेग्मी र बिष्णुलाल कुम्हालले आफुहरुलाई सम्मान र अभिनन्दन गरिएकोमा हर्ष व्यक्त गर्दै आयोजकलाई धन्यवाद दिएका थिए ।
कार्यक्रममा महेन्द्र पुस्तकालयको अतिरिक्त क्रियाकलाप उपसमितिको आयोजनामा आयोजित निबन्ध लेखन प्रतियोगिताका बिजयी बिद्यार्थीहरुलाई पुरस्कृत गरिएको पुस्तकालयका सचिव सतिस निरौलाले जानकारी दिए । उनका अनुसार प्रतियोगितामा प्रथम हुने त्रिभुवन माबी कोहलपुरका महेश्वर उपाध्याय , दोश्रो हुने होलिल्याण्ड नेपालगन्जकी स्वस्तिका यादव , तेस्रो हुने मंगल माबी नेपालगन्जकी गोमा त्रिपाठी र सान्त्वना हुने त्रिभुवन माबी कोहलपुरका गुराँस चन्द ठकुरीलाई नगद , प्रमाणपत्र र पुरस्कार प्रदान गरिएको थियो ।
प्रतिक्रिया