काठमाडौं । राष्ट्रिय प्रजातन्त्र पार्टी (राप्रपा) का संसदीय दलका नेता ज्ञानबहादुर शाहीले ट्राफिक नियम कार्यान्वयनमा दोहोरो मापदण्ड अपनाइएको भन्दै सरकारको आलोचना गरेका छन् ।
मंगलबार प्रतिनिधिसभा बैठकमा बोल्दै शाहीले ट्राफिक नियम उल्लंघन गर्दा सर्वसाधारणलाई कारबाही गरिने भए पनि सिटबेल्ट नलगाई सवारी साधन प्रयोग गर्ने प्रधानमन्त्री र गृहमन्त्रीमाथि किन कारबाही नहुने भन्दै प्रश्न उठाए । उनले कानुन सबै नागरिकका लागि समान रूपमा लागू हुनुपर्ने बताए ।
“हामी कानुन हटाउन भन्न खोजेका होइनौं, कानुन सबैका लागि बराबरी हुनुपर्छ भन्ने माग गरेका हौं,” उनले भने ।
शाहीले मुगुका गणेश नेपालीको आत्मदाह प्रकरणप्रति पनि सरकारको ध्यानाकर्षण गराए । जलनबाट गम्भीर घाइते भएका नेपालीलाई घटनापछि हिँडाइएको तथा विशेषज्ञ अस्पतालमा तत्काल नलगेर वीर अस्पतालमा उपचार गरिएको विषयमा उनले प्रश्न उठाए ।
उनले राज्यका निकायले नागरिकप्रति संवेदनशील भएर काम गर्नुपर्ने भन्दै यस्ता घटनाबाट पाठ सिक्न सरकारलाई आग्रह गरे ।
प्रतिक्रिया