काठमाडौं । पुँजी बजार, धितोपत्र तथा बिमा क्षेत्रका प्रतिनिधिहरूले प्रधानमन्त्री बालेन्द्र शाहसँग भेट गरी बजार सुधारका लागि आवश्यक कानुनी, नीतिगत तथा संरचनागत परिवर्तनको माग गरेका छन्।
करिब डेढ घण्टा चलेको छलफलमा बजारको स्थायित्व, लगानीकर्ता संरक्षण र लगानीमैत्री वातावरण निर्माणका विषयमा विस्तृत रूपमा विचार–विमर्श भएको हो।
प्रधानमन्त्री तथा मन्त्रिपरिषद्को कार्यालय, सिंहदरबारमा भएको बैठकमा सहभागी सरोकारवालाले प्राथमिक निष्कासन (आईपीओ)देखि दोस्रो बजारसम्मका व्यवस्थामा समयानुकूल सुधार आवश्यक रहेको धारणा राखेका थिए। उनीहरूले संस्थागत लगानीकर्ताको दायरा विस्तार, कर प्रणाली पुनरावलोकन तथा विदेशी र गैरआवासीय नेपाली लगानीकर्तालाई आकर्षित गर्ने नीति अवलम्बन गर्न सरकारसँग आग्रह गरेका छन्।
स्टक ब्रोकर एसोसिएसन अफ नेपालका अध्यक्ष सागर ढकालका अनुसार प्रधानमन्त्रीले सरकारले निजी क्षेत्र र लगानीकर्ताको विश्वास कायम राख्ने प्रतिबद्धता व्यक्त गर्दै ढुक्क भएर लगानी गर्न आग्रह गरेका थिए। उनका अनुसार छलफल सकारात्मक र परिणाममुखी भएको थियो।
बैठकमा योग्य संस्थागत लगानीकर्तालाई प्राथमिक निष्कासनमा ४० प्रतिशतसम्म सेयर छुट्याउने व्यवस्था, बुक बिल्डिङ प्रणालीलाई प्रभावकारी रूपमा कार्यान्वयन गर्ने तथा दोस्रो बजारमा मूल्य निर्धारण प्रणालीलाई अझ पारदर्शी र प्रतिस्पर्धी बनाउने विषयमा विशेष जोड दिइएको थियो। साथै प्रवर्द्धक तथा संस्थापक सेयर कारोबारसम्बन्धी विद्यमान व्यवस्थामा सुधार गर्नुपर्ने आवश्यकता पनि औँल्याइएको थियो।
बजारमा तरलता अभिवृद्धिका लागि इन्ट्रा–डे कारोबार, सेक्युरिटिज लेन्डिङ एन्ड बरोइङ तथा सेक्युरिटिज नेट सेटलमेन्ट प्रणाली लागू गर्दै सर्ट सेल कारोबारलाई व्यवस्थित रूपमा सञ्चालन गर्नुपर्ने प्रस्ताव पनि सरोकारवालाले अघि सारेका थिए।
त्यसैगरी, पुँजीगत लाभकरको विद्यमान व्यवस्थाले बजारमा प्रतिकूल प्रभाव पारेको उल्लेख गर्दै वास्तविक नाफामा मात्र कर लगाउने व्यवस्था लागू गर्नुपर्ने सुझाव पनि सरकारसमक्ष प्रस्तुत गरिएको थियो। नाफा–नोक्सान समायोजनपछि मात्रै कर निर्धारण हुने प्रणाली लागू गर्नुपर्ने उनीहरूको माग छ।
छलफलमा संस्थागत लगानीकर्ताको सहभागिता बढाउने, गैरआवासीय नेपाली तथा विदेशी संस्थागत लगानीकर्तालाई दोस्रो बजारमा प्रवेश सहज बनाउने तथा नेपाल स्टक एक्सचेञ्ज (नेप्से)लाई रणनीतिक साझेदारसहित पुनर्संरचना गर्ने विषयमा समेत विचार आदान–प्रदान भएको थियो।
प्रधानमन्त्री शाहले पुँजी बजारलाई थप चलायमान र विश्वासयोग्य बनाउन सरकार आवश्यक नीतिगत सुधार गर्न तयार रहेको बताएका थिए। निजी क्षेत्रसँग सहकार्य गर्दै लगानीको वातावरण थप सहज बनाउने सरकारको उद्देश्य रहेको उनको भनाइ उद्धृत गरिएको छ।
बैठकमा नेपाल धितोपत्र बोर्ड (सेबोन)का अध्यक्ष गोपाल भट्ट, नेपाल स्टक एक्सचेञ्ज (नेप्से)का अध्यक्ष अमृत लम्साल तथा स्टक ब्रोकर एसोसिएसन अफ नेपालका अध्यक्ष सागर ढकाललगायत पुँजी बजारका विभिन्न सरोकारवाला सहभागी थिए।
प्रतिक्रिया