काठमाडौं । सरकारले मूल्य अभिवृद्धि कर (भ्याट) र स्थायी लेखा नम्बर (प्यान) मा आबद्ध व्यवसायीबाट सामान वा सेवा खरिद गर्दा सक्कली बिल लिने उपभोक्तालाई प्रोत्साहन गर्न नयाँ पुरस्कार योजना कार्यान्वयनमा ल्याउने भएको छ ।
‘सक्कली बिल लिनुहोस्, लखपति बन्नुहोस्’ नारासहित बजेटमार्फत घोषणा गरिएको यस योजनाअन्तर्गत अब दैनिक एक जना उपभोक्ताले १ लाख रुपैयाँ पुरस्कार प्राप्त गर्नेछन् । त्यस्तै, हरेक महिनामा दुई जना भाग्यशाली विजेताले १०-१० लाख रुपैयाँको बम्पर पुरस्कार जित्नेछन् ।
सरकारका अनुसार १०० रुपैयाँभन्दा बढी मूल्यको सामान खरिद गर्दा वा होटल, रेस्टुरेन्टलगायतबाट सेवा लिँदा प्राप्त हुने सक्कली बिलको नम्बरका आधारमा विजेता छनोट गरिनेछ । अनलाइन तथा नगद दुवै माध्यमबाट गरिएको भुक्तानीमा प्राप्त सक्कली बिल यस योजनाका लागि मान्य हुनेछ ।
हालका लागि प्रत्येक महिनाको १६ गते र मसान्तमा (पाक्षिक रूपमा) विजेताको घोषणा गर्ने व्यवस्था गरिएको सरकारले जनाएको छ । योजनाको सञ्चालन, विजेता छनोट तथा पुरस्कार वितरणसम्बन्धी विस्तृत प्रक्रिया निर्धारण गर्न सरकारले छुट्टै कार्यविधि पनि तयार पारेको जनाएको छ ।
प्रतिक्रिया