रुपन्देही प्रहरीको घुमुवा बनेर रकम असुली गर्ने राणा नक्कली रिभल्वर सहित पक्राउ

बुटवल । रुपन्देहीको बिभिन्न स्थानमा रुपन्देही प्रहरीको घुमुवा बनेर रकम असुलीमा लागेका १ जनालाई प्रहरीले पक्राउ गरेको छ । घुमुवाको अवरणमा नक्कली रिभल्वर देखाई रकम असुल्ने व्यक्तिलाई रुपन्देही प्रहरीले पक्राउ गरेको हो ।

पक्राउ पर्नेमा रुपन्देही सिद्धार्थनगर नगरपालिका वडानं.१३ घर भई हाल जिल्ला रुपन्देही ओमसतिया गाउपालिका वडा नं.४ स्थित बालापुरमा कोठा भाडा लिई बस्दै आएका ४९ वर्षिय राकेश प्रताप राणा रहेका छन् । राणाले भैरहवाको बजार क्षेत्रमा जिल्ला प्रहरी कार्यालय रुपन्देहीको घुमुवा हुँ भन्दै पेस्तोल देखाई बजारमा १० हजार रुपैयाँ पैसा मगिरहेको भन्ने बिशेष सूचनाको आधारमा जिल्ला प्रहरी कार्यालय रुपन्देहीबाट खटिएको प्रहरी टोलीले उनलाई पक्राउ गरेको प्रहरीले जनाएको छ । राणालाई सिद्धार्थनगर नगरपालिका वडानं. १३ शान्तिनगरबाट नियन्त्रणमा लिईएको रुपन्देही प्रहरी प्रवक्ता डीएसपी कृष्ण कुमार चन्दले बताए ।

पक्राउ परेका राणाको कोठाबाट लुकाई छिपाई राखेको नक्कली रिभल्वर १ थान, सवारी चालक अनुमतिपत्र, लागु औषध गाँजा ५०० ग्राम, मोबाईल र नेपाली नगद रु २ हजार ६०० रुपैयाँ बरामद भएको डीएसपी चन्दले बताए ।

पक्राउ परेका राणामाथि थप अनुसन्धान कार्य जारी रहेको प्रहरीले जनाएको छ ।