काठमाडौं । चिकित्सकमाथि भएको हातपातको विरोधमा नेपालभरका अस्पतालमा आज आकस्मिकबाहेकका सबै स्वास्थ्य सेवा बन्द हुने भएका छन् ।
साउन ९ गते वीरगञ्जस्थित नारायणी अस्पतालमा कार्यरत चिकित्सक तथा स्वास्थ्यकर्मीमाथि भएको हातपातको घटनाको विरोधमा नेपाल चिकित्सक संघले आन्दोलनका कार्यक्रम घोषणा गर्दै आकस्मिकबाहेकका सेवा स्थगित गर्ने निर्णय गरेको हो ।
संघले विज्ञप्ति जारी गर्दै चिकित्सक तथा स्वास्थ्यकर्मीमाथि भएको दुव्र्यवहार र राज्यको व्यवहारप्रति विरोध जनाउँदै मंगलबार देशभरका अस्पतालमा आकस्मिकबाहेकका सेवा बन्द गरिने जनाएको छ ।
संघका अनुसार नारायणी अस्पतालमा बिरामीको मृत्यु भएपछि भएको विवादका क्रममा चिकित्सकमाथि हातपात हुँदा डा. प्रमोद रामको टाउकोमा चोट लागेको थियो ।
नेपाल चिकित्सक संघले घटनामा संलग्न दोषीलाई तत्काल पक्राउ गरी कानुनी कारबाही गर्न सरकारसँग माग गरेको छ ।
प्रतिक्रिया