गोरखा । लमजुङको मध्यनेपाल नगरपालिका-७ भाटबेशीमा पहिरोले धन्सार घर भत्किँदा पुरिएर बुबा र छोरीको मृत्यु भएको छ भने दुई जना घाइते भएका छन् ।
मंगलबार बिहान करिब २ः३० बजे चितिखोलाबाट भाटबेशी ल्याइएको कुलो भत्किएपछि आएको पहिरोले स्थानीय विष्णुदत्त सुवेदीको ढुंगा-माटोले बनेको दुईतले कच्ची धन्सारमा क्षति पुगेको जिल्ला प्रहरी कार्यालय लमजुङले जनाएको छ ।
पहिरोमा परी ५१ वर्षीय टिकाबहादुर विक र उनकी १५ वर्षीया कान्छी छोरी बिनिता विकको मृत्यु भएको प्रहरीले जनाएको छ ।
घटनामा टिकाबहादुरकी श्रीमती ५० वर्षीया सुकमाया विक र १६ वर्षीया जेठी छोरी अस्मिता विक घाइते भएका छन् । उनीहरूको पश्चिमाञ्चल क्षेत्रीय अस्पताल, पोखरामा उपचार भइरहेको छ ।
घटनाको जानकारी प्राप्त हुनासाथ इलाका प्रहरी कार्यालय भोर्लेटारबाट प्रहरी निरीक्षक ध्रुवप्रसाद शर्माको नेतृत्वमा खटिएको टोलीले उद्धार कार्य सञ्चालन गरेको प्रहरीले जनाएको छ ।
प्रतिक्रिया