काठमाडौं । व्यवसायी शेखर गोल्छा एक करोड रुपैयाँ धरौटीमा रिहा भएका छन्।
काठमाडौं जिल्ला अदालतले मंगलबार बिमासम्बन्धी कसुरमा ७५ लाख रुपैयाँ र धितोपत्रसम्बन्धी कसुरमा २५ लाख रुपैयाँ धरौटी माग गर्दै उनलाई रिहा गर्न आदेश दिएको हो।
न्यायाधीश प्रतिमाकुमारी भट्टराईको इजलासले छुनछेक बहसपछि गोल्छालाई धरौटीमा छाड्ने आदेश दिएकी हुन् ।
गोल्छा मंगलबार अदालतमा उपस्थित भएका थिए। अदालतको आदेशअनुसार उनले एक करोड रुपैयाँ धरौटी बुझाएपछि रिहा भएका छन् ।
यसै मुद्दामा यसअघि अदालतले अन्य दुई प्रतिवादी दीपक भट्ट र शुलभ अग्रवालसँग पनि धरौटी माग गरेको थियो।
अदालतले बिमासम्बन्धी कसुरमा शुलभ अग्रवालसँग दुई करोड रुपैयाँ तथा दीपक भट्टसँग एक करोड ५० लाख रुपैयाँ धरौटी माग गरेको थियो। त्यस्तै, धितोपत्रसम्बन्धी कसुरमा अग्रवालसँग थप दुई करोड ३० लाख रुपैयाँ र भट्टसँग एक करोड रुपैयाँ धरौटी माग गर्ने आदेश दिएको थियो।
प्रतिक्रिया