काठमाडौं । प्रधानमन्त्री बालेन्द्र शाहले राष्ट्रिय सुरक्षा परिषद्को बैठक बोलाएका छन् ।
प्रधानमन्त्री तथा मन्त्रिपरिषद्को कार्यालय, सिंहदरबारमा आज बिहान ११ः३० बजे बस्नेगरी शाहले बैठक बोलाएका हुन्। सुरक्षा परिषद्को बैठकको अध्यक्षता प्रधानमन्त्रीले गर्छन् ।
प्रधानमन्त्रीको सचिवालयका अनुसार बैठकमा पछिल्लो समय देशमा विकसित सुरक्षा अवस्था, समसामयिक राष्ट्रिय विषय तथा आवश्यक सुरक्षा रणनीतिबारे छलफल हुनेछ ।
विशेषगरी सुनसरीमा प्रहरीको गोली लागेर एक युवकको मृत्यु भएपछि सुनसरीसहित केही जिल्लामा सामाजिक सद्भाव बिथोल्ने गतिविधि देखिएको पृष्ठभूमिमा सरकारले सुरक्षा अवस्थाबारे उच्चस्तरीय समीक्षा गर्न लागेको जनाइएको छ ।
राष्ट्रिय सुरक्षा परिषद्मा प्रधानमन्त्री, रक्षामन्त्री, गृहमन्त्री, परराष्ट्रमन्त्री, अर्थमन्त्री, नेपाल सरकारका मुख्य सचिव, प्रधान सेनापति तथा रक्षा सचिव सदस्य रहने संवैधानिक व्यवस्था छ ।
सरकारले पछिल्ला घटनाक्रमलाई मध्यनजर गर्दै शान्ति, सुरक्षा र सामाजिक सद्भाव कायम राख्ने विषयमा परिषद्को बैठकबाट आवश्यक रणनीतिक निर्णय र निर्देशन दिने अपेक्षा गरिएको छ।
प्रतिक्रिया