जनकपुरधाम । जिल्ला प्रशासन कार्यालय धनुषाले जनकपुरधामसहित आसपासका क्षेत्रमा अनिश्चितकालीन कर्फ्यु आदेश जारी गरेको छ ।
प्रमुख जिल्ला अधिकारी प्रेमप्रसाद लुइँटेलका अनुसार बिहीबार दिउँसो ३ः३० बजेदेखि अर्को सूचना जारी नभएसम्मका लागि जनकपुरधाम उपमहानगरपालिकाको सम्पूर्ण क्षेत्र, लक्ष्मीनिया गाउँपालिका तथा नगराइन नगरपालिकाका तोकिएका क्षेत्रमा कर्फ्यु लागू गरिएको हो ।
सुनसरीको कप्तानगञ्जमा भएको घटनाको विरोधमा जनकपुरधामका विभिन्न स्थानमा बिहीबार बिहानदेखि प्रदर्शन हुँदै आएको थियो । प्रदर्शन चर्किँदै गएपछि शान्ति-सुरक्षा कायम राख्न प्रशासनले कर्फ्यु आदेश जारी गरेको जनाएको छ ।
कर्फ्यु अवधिभर सम्बन्धित क्षेत्रमा कुनै पनि प्रकारका भेला, जुलुस, प्रदर्शन, धर्ना, घेराउ तथा आवतजावत गर्न निषेध गरिएको प्रशासनले जनाएको छ ।
प्रशासनले सर्वसाधारणलाई कर्फ्यु आदेशको पूर्ण पालना गर्न आग्रह गर्दै शान्ति र सार्वजनिक सुरक्षा कायम राख्न सुरक्षा निकायलाई आवश्यक निर्देशनसमेत दिएको छ ।
प्रतिक्रिया