विराटनगर । सुनसरीको देवानगञ्ज गाउँपालिका-३ कप्तानगञ्जमा आइतबार राति भएको गोलीकाण्डमा घाइते भएका अर्का एक युवकको उपचारका क्रममा मृत्यु भएको छ। यससँगै घटनामा ज्यान गुमाउनेको संख्या दुई पुगेको छ ।
मोरङ प्रहरीका सूचना अधिकारी प्रहरी नायब उपरीक्षक मकेन्द्रकुमार मिश्रका अनुसार देवानगञ्ज-३ निवासी २२ वर्षीय जयप्रकाश मेहताको विराटनगरस्थित न्युरो अस्पतालमा उपचारका क्रममा बिहीबार दिउँसो मृत्यु भएको हो । चिकित्सकले दिउँसो १ः२४ बजे उनलाई मृत घोषणा गरेका थिए ।
प्रहरीका अनुसार जयप्रकाशको पेटमा गोली लाग्दा आन्द्रा बाहिर निस्किएको थियो । घटनाको भोलिपल्ट सोमबार उनको शल्यक्रिया गरिएको भए पनि अवस्था गम्भीर रहेकाले भेन्टिलेटरमा राखेर उपचार भइरहेको थियो । स्वास्थ्य अवस्थामा सुधार आउन नसकेपछि उपचारकै क्रममा उनको मृत्यु भएको प्रहरीले जनाएको छ। हाल उनको शव न्युरो अस्पतालमै राखिएको छ ।
यसअघि सोही घटनामा गोली लागेर गम्भीर घाइते भएका देवानगञ्ज-४ का २५ वर्षीय ओमप्रकाश मेहताको आइतबार राति उपचारका क्रममा मृत्यु भएको थियो । उनलाई उपचारका लागि न्युरो अस्पताल पुर्याइएलगत्तै राति १०ः४० बजे चिकित्सकले मृत घोषणा गरेका थिए । ओमप्रकाशको शव पनि हालसम्म अस्पतालमै रहेको प्रहरीले जनाएको छ ।
प्रतिक्रिया