सरकार र पीडित परिवारबीच सातबुँदे सहमति, मृतकलाई सहिद घोषणा गरिने

काठमाडौं । सुनसरीको देवानगञ्ज गाउँपालिका-३ कप्तानगञ्जमा भएको घटनापछि गृह मन्त्रालय र पीडित पक्षबीच सातबुँदे सहमति भएको छ । सहमतिअनुसार मदरसाको कानुनी हैसियतसहित सम्बन्धित विषयमा तत्काल छानबिन सुरु गरिने भएको छ ।

बिहीबार गृहमन्त्री र साउन १० गते भएको घटनामा ज्यान गुमाएका ओमप्रकाश मेहता र जयप्रकाश मेहताका परिवारबीच भएको सहमतिमा घटनाको निष्पक्ष तथा प्रभावकारी छानबिन गरी दोषीमाथि कानुनी कारबाही गर्ने उल्लेख गरिएको छ ।

सहमतिअनुसार सरकारले दुवै मृतकलाई सहिद घोषणा गर्ने र मृतकका परिवारलाई जनही १० लाख रुपैयाँ राहत उपलब्ध गराउनेछ ।

यस्तै, मदरसाको कानुनी हैसियत तथा त्यससँग सम्बन्धित विषयमा आवश्यक छानबिन तत्काल सुरु गर्ने, मृतकका परिवारका एक जना योग्य सदस्यलाई रोजगारीको अवसर उपलब्ध गराउने तथा घटनाको अध्ययनका लागि गठित छानबिन समितिले पेश गर्ने प्रतिवेदनका सुझाव र सिफारिस तत्काल कार्यान्वयन गर्ने सहमति भएको छ ।

सहमतिमा मृतकद्वयको सम्झनामा स्थानीय सरकारसँगको समन्वयमा गाउँपालिकाको उपयुक्त स्थानमा स्मृति पार्क निर्माण गर्ने तथा शुक्रबार दिउँसो दुवै मृतकको अन्त्येष्टि गर्ने उल्लेख गरिएको छ ।