काठमाडौं । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले आदिवासी जनजाति समुदायको पहिचान, अधिकार, प्रतिनिधित्व र सम्मानका लागि भइरहेको संघर्षलाई अझ सशक्त बनाउनुपर्ने बताएका छन्।
विश्व आदिवासी जनताको अन्तर्राष्ट्रिय दिवसका अवसरमा शुभकामना सन्देश जारी गर्दै प्रचण्डले नेपाली जनताको लामो संघर्ष र बलिदानबाट प्राप्त समावेशी, समानुपातिक तथा सहभागितामूलक अधिकारको रक्षा गर्दै बाँकी अधिकार प्राप्तिका लागि संघर्ष अघि बढाउनुपर्ने बताएका हुन्।
उनले विविधताको सम्मान र समान अधिकारबिना राष्ट्रिय एकता बलियो हुन नसक्ने उल्लेख गरेका छन्। सबै जाति, भाषा, संस्कृति, क्षेत्र र समुदायको न्यायपूर्ण प्रतिनिधित्व तथा सम्मानपूर्ण सहभागिताबाट मात्रै समावेशी लोकतन्त्र, सामाजिक न्याय र सुदृढ राष्ट्र निर्माण गर्न सकिने उनको भनाइ छ।
प्रचण्डले विश्व आदिवासी दिवसले आदिवासी जनजाति समुदायको अधिकार, समानता र न्यायको संघर्षलाई थप अघि बढाउन प्रेरणा प्रदान गर्ने विश्वास व्यक्त गरेका छन्।
उनले दिवसका अवसरमा सम्पूर्ण आदिवासी जनजाति समुदायमा हार्दिक शुभकामना समेत व्यक्त गरेका छन्।
प्रतिक्रिया