काठमाडौं । नेपाल-चीन सीमावर्ती तिब्बतमा भीषण पहिरोपछि नदी थुनिएर बनेको कृत्रिम ताल फुट्ने जोखिम बढेपछि चिनियाँ अधिकारीहरूले तत्कालका लागि खोज तथा उद्धार कार्य रोकेका छन् ।
गत बुधबार गएको पहिरो र त्यसपछि आएको लेदोसहितको बाढीले नेपाल-चीन सीमास्थित जिरोङ (केरुङ) नाकामा ठूलो क्षति पुर्याएको थियो । पहिरोका कारण नदीको बहाव रोकिएर बनेको कृत्रिम तालमा पछिल्लो समय पानीको सतह तीव्र रूपमा बढिरहेको अधिकारीहरूले बताएका छन् ।
लगातारको वर्षाका कारण तालको पानी खतरनाक तहमा पुगेपछि जुनसुकै बेला बाँध फुट्न सक्ने जोखिम बढेको छ । जोखिमलाई ध्यानमा राख्दै उद्धारकर्मीलाई प्रभावित क्षेत्रबाट टाढा रहन निर्देशन दिइएको चिनियाँ राज्य सञ्चालित सञ्चारमाध्यमले जनाएका छन् ।
बीबीसीका अनुसार विपत्तिपछि तिब्बततर्फ ५५० भन्दा बढी मानिस बेपत्ता भएका छन् । बेपत्ता हुनेमा करिब २६० जना विदेशी पर्यटक तथा तीर्थयात्री रहेको बताइएको छ । तीमध्ये कैलाश मानसरोवर दर्शनका लागि पुगेका तीर्थयात्रीको संख्या उल्लेख्य रहेको जनाइएको छ ।
चिनियाँ अधिकारीहरूले अहिले जिरोङ नाकाभन्दा माथिल्लो क्षेत्रमा बनेको तालको पानीको सतह र त्यसबाट उत्पन्न जोखिमको निरन्तर निगरानी गरिरहेका छन् । भारी वर्षा जारी रहेकाले आगामी दिनमा तल्लो तटीय क्षेत्रमा बाढीको जोखिम थप बढ्न सक्ने आकलन गरिएको छ ।
सम्भावित मानवीय तथा भौतिक क्षति रोक्न प्रभावित क्षेत्रमा आवतजावतमा समेत कडाइ गरिएको छ ।
प्रतिक्रिया