बेइजिङ । चीनले केरुङ क्षेत्रमा आएको विनाशकारी बाढी तथा पहिरोबाट प्रभावित नेपाललाई आपत्कालीन सहायता उपलब्ध गराउने भएको छ। चिनियाँ कम्युनिस्ट पार्टी (सीपीसी)को शुक्रबार बसेको उच्चस्तरीय बैठकले नेपालमा उद्धार तथा राहतका लागि सहयोग गर्ने र अन्तर्राष्ट्रिय उद्धार सहकार्य अघि बढाउने निर्णय गरेको हो।
चिनियाँ राष्ट्रपति तथा सीपीसी केन्द्रीय समितिका महासचिव सी चिनफिङको अध्यक्षतामा बसेको पार्टीको राजनीतिक ब्यूरो बैठकले ग्यिरोङ काउन्टीमा बुधबार आएको विनाशकारी पहिरोपछि उत्पन्न अवस्थाको समीक्षा गर्दै उद्धार तथा राहत कार्यबारे आवश्यक व्यवस्था गर्न निर्देशन दिएको चिनियाँ समाचार संस्था सिन्ह्वाले जनाएको छ।
बैठकले विपत्तिबाट प्रभावित नेपालको क्षेत्रमा आपत्कालीन सहायता उपलब्ध गराउने र आवश्यकताअनुसार अन्तर्राष्ट्रिय उद्धार सहकार्य अघि बढाउने निर्णय गरेको हो।
बैठकको सुरुवातमा राष्ट्रपति सी चिनफिङसहित सहभागी नेताहरूले बुधबार ग्यिरोङको सीमा नाकामा आएको प्राकृतिक विपत्तिमा परी ज्यान गुमाएकाहरूको सम्झनामा मौनधारण गरेका थिए।
सिन्ह्वाका अनुसार पार्टी केन्द्रीय समितिको सशक्त नेतृत्वमा चीनमा आपत्कालीन उद्धार कार्य तीव्र, व्यवस्थित र प्रभावकारी समन्वयका साथ अघि बढिरहेको छ। प्रभावित नागरिकको पुनर्स्थापना तथा विपत्तिपछिको व्यवस्थापनका लागि समेत व्यापक प्रयास भइरहेको बैठकमा जनाइएको छ।
ग्यिरोङ क्षेत्र अत्यधिक चिसो हिमाली भूभागमा रहेको तथा यहाँ भिराला उपत्यका, परिवर्तनशील मौसम, आसपासका हिमनदी र हिमताल तथा सम्भावित भौगर्भिक जोखिम रहेकाले उद्धार कार्य चुनौतीपूर्ण रहेको बैठकले जनाएको छ।
बैठकले सम्बन्धित सबै निकाय तथा विभागलाई उद्धार तथा राहत कार्यमा दृढ र प्रभावकारी कदम चाल्न निर्देशन दिएको छ। वैज्ञानिक ढंगले खोज तथा उद्धार योजना तयार पार्दै बेपत्ता भएका सबै चिनियाँ तथा विदेशी नागरिकको खोजी तथा उद्धारका लागि हरसम्भव प्रयास गर्न पनि बैठकले जोड दिएको छ।
ग्यिरोङ काउन्टीमा बुधबार आएको पहिरोपछि चीनको सिजाङ क्षेत्रसँगै नेपालतर्फको भोटेकोशी नदी र आसपासका क्षेत्रमा समेत विनाशकारी बाढी आएको थियो। बाढीका कारण नेपालमा ठूलो जनधनको क्षति भएको छ।
नेपालमा भएको विपत्तिपछि चीनले उद्धार तथा राहतका लागि सहयोग गर्ने निर्णयलाई शुक्रबारको सीपीसी बैठकबाट औपचारिक रूपमा अघि बढाइनुलाई दुई देशबीचको विपद् व्यवस्थापन तथा मानवीय सहकार्यका दृष्टिले महत्वपूर्ण मानिएको छ।
प्रतिक्रिया