रसुवाको बाढी प्रभावित क्षेत्रमा पुग्यो चिनियाँ प्राबिधिक टोली

काठमाडौं । रसुवा भोटेकोशीमा आएको बाढीका कारण विभिन्न जलविद्युत् परियोजनाका टनेल सुरुङमा फसेकाहरूको उद्धारका लागि चिनियाँ प्राबिधिक टोली नेपाल आइपुगेको छ ।

चीनले पठाएको उद्धार टोली हेलिकोप्टरमार्फत केरुङ नाकाबाट नेपाल प्रवेशगरि सीधै रसुवाको बाढी प्रभावित क्षेत्रमा पुगेको हो । टोलीमा चिनियाँ जनमुक्ति सेनाका सुरुङ उद्धारसम्बन्धी ४ जना विज्ञ रहेको बताइएको छ ।

सरकारले रसुवाका विभिन्न जलविद्युत् परियोजनाका सुरुङमा फसेका नेपाली तथा विदेशी इन्जिनियर, प्राविधिक र कामदारको उद्धारका लागि चीनसँग सहयोग मागेपछि चीनले प्राबिधक सहितको टोली नेपाल पठाएको हो ।

चिनियाँ टोलीले सुरुङमा फसेकाहरूको उद्धारमा नेपाली उद्धार टोलीसँग समन्वय गरी आवश्यक प्राविधिक सहयोग गर्ने बताइएको छ । यसअघि भारतबाट पनि सुरुङ उद्धारसम्बन्धी ११ जनाको विज्ञ टोली नेपाल आइसकेको छ ।