काठमाडौं । प्रधानमन्त्री वालेन्द्र शाह र सत्तारुढ राष्ट्रिय स्वतन्त्र पार्टी (रास्वपा)का सभापति रवि लामिछानेबीच बाढीपहिरोबाट प्रभावित क्षेत्रमा भइरहेको खोज, उद्धार तथा राहत कार्यबारे छलफल भएको छ ।
प्रधानमन्त्री तथा मन्त्रिपरिषद्को कार्यालय, सिंहदरबारमा भएको भेटवार्तामा रसुवाको भोटेकोशी नदीमा आएको बाढीबाट प्रभावित नागरिकको उद्धार, राहत वितरण तथा नागरिक व्यवस्थापनका विषयमा विशेष छलफल भएको हो ।
भेटमा विपद्बाट प्रभावित नागरिकलाई सुरक्षित स्थानमा स्थानान्तरण गर्ने, राहत सामग्री सहज रूपमा पुर्याउने तथा बाढीबाट क्षतिग्रस्त भौतिक संरचनाको पुनःस्थापनाका विषयमा समेत छलफल भएको जनाइएको छ ।
प्रधानमन्त्री शाहले विपद् प्रभावित क्षेत्रमा नागरिकको जीउधनको रक्षा, राहत वितरण र पुनःस्थापनाका लागि राज्यका सबै संयन्त्रलाई पूर्ण क्षमताका साथ परिचालन गरिएको जानकारी गराएका छन् ।
भोटेकोशी नदीमा आएको बाढीबाट रसुवासहित विभिन्न क्षेत्रमा ठूलो जनधनको क्षति भएको छ । विपद्पछि सरकारले प्रभावित क्षेत्रमा खोज तथा उद्धार, राहत वितरण र विस्थापित नागरिकको व्यवस्थापनलाई प्राथमिकतामा राखेको छ ।
भेटवार्तालाई विपद्को समयमा सरकारका उद्धार तथा राहत प्रयासलाई थप प्रभावकारी बनाउने र प्रभावित नागरिकको पुनःस्थापनालाई तीव्रता दिने विषयमा केन्द्रित छलफलका रूपमा लिइएको छ।
प्रतिक्रिया