काठमाडौं । प्रतिनिधिसभाको बैठक भोलि (१७ भदौ) दिउँसो १ बजे बस्ने भएको छ ।
प्रतिनिधिसभाको कार्यव्यवस्था परामर्श समितिको बैठकले भोलि दिउँसो १ बजे बैठक बोलाउने निर्णय गरेको संघीय संसद् सचिवालयका प्रवक्ता एकराम गिरीले जानकारी दिए ।
बैठकमा सभामुख डोलप्रसाद अर्यालले मुलुकमा देखिएको महाविपद्बारे विशेष प्रस्ताव पेस गर्ने तयारी गरेका छन् । उक्त प्रस्तावमाथि दलीय आधारमा विभिन्न राजनीतिक दलका नेताहरूले धारणा राख्नेछन् ।
गत १० भदौमा भोटेकोसी र त्रिशूली नदीमा आएको विनाशकारी बाढीले ठूलो जनधनको क्षति पुर्याएको थियो । बाढीबाट प्रभावित क्षेत्रमा खोज, उद्धार तथा राहतका विषयमा समेत संसद्मा छलफल हुने अपेक्षा गरिएको छ ।
यसअघि १० भदौमै प्रतिनिधिसभाको बैठक बसेको थियो । उक्त बैठकपछि अनिश्चितकालका लागि स्थगित भएको प्रतिनिधिसभा बैठक पुनः १७ भदौमा बोलाइएको हो ।
प्रतिक्रिया