काठमाडौं । मलेखु-काठमाडौं सडकखण्डअन्तर्गत धादिङको गजुरी गाउँपालिका-२ परेवाभिरमा सडक मर्मत कार्य नसकिएपछि आइतबार साँझ ६ बजेसम्म सवारी आवागमन बन्द गरिएको छ ।
जिल्ला प्रशासन कार्यालय धादिङले शनिबार साँझ सूचना जारी गर्दै अत्यावश्यक सवारीसाधनबाहेक सबै सवारीसाधनको आवागमन रोकिएको जनाएको छ ।
भदौ १० गते भोटेकोशीमा आएको बाढीका कारण परेवाभिरस्थित पृथ्वीराजमार्गमा क्षति पुगेपछि उक्त सडकखण्डमा एकतर्फी रूपमा यातायात सञ्चालन हुँदै आएको थियो । क्षतिग्रस्त सडकको मर्मतका लागि शनिबार बिहान ६ बजेदेखि बेलुका ६ बजेसम्म सवारी आवागमन बन्द गरिएको थियो ।
निर्धारित समयमा मर्मत कार्य सम्पन्न हुन नसकेपछि आइतबार पनि बिहान ६ बजेदेखि बेलुका ६ बजेसम्म सोही सडकखण्डबाट सञ्चालन हुने सवारीसाधनमा रोक लगाइएको जिल्ला प्रशासन कार्यालय धादिङले जनाएको छ ।
बन्द अवधिमा एम्बुलेन्स, शववाहनलगायत अत्यावश्यक सवारीसाधनलाई भने आवागमनको अनुमति दिइनेछ । प्रशासनले यात्रु तथा सम्बन्धित सबै सरोकारवालालाई उक्त अवधिमा वैकल्पिक मार्ग प्रयोग गर्न अनुरोध गरेको छ ।
प्रतिक्रिया