काठमाडौं । प्रधानमन्त्री वालेन्द्र शाहले रसुवाको भोटेकोशी बाढीपछि विपद् संकटग्रस्त क्षेत्र घोषणा गरिएका विभिन्न जिल्ला तथा स्थानीय तहका जनप्रतिनिधिसँग छलफल सुरु गरेका छन्।
प्रधानमन्त्री तथा मन्त्रिपरिषद्को कार्यालय, सिंहदरबारमा सोमबार बिहान ११ बजेदेखि नुवाकोट, रसुवा, धादिङ, गोरखा र तनहुँका विपद् प्रभावित १५ स्थानीय तहका प्रमुख तथा प्रतिनिधिसभा सदस्यहरूसँग छलफल भइरहेको प्रधानमन्त्रीको सचिवालयले जनाएको छ।
छलफलमा बाढी तथा त्यसबाट सिर्जित विपद्पछि प्रभावित क्षेत्रमा उत्पन्न अवस्थाको समीक्षा, वर्तमान परिस्थिति, तत्काल चाल्नुपर्ने आवश्यक कदम तथा पुनरुत्थानका विषयमा केन्द्रित रहेर छलफल भइरहेको छ।
भोटेकोशीसहित विभिन्न नदी तथा खोलामा आएको बाढी, पहिरो र त्यसबाट भएको जनधनको क्षतिपछि प्रभावित जिल्लाका कतिपय क्षेत्रलाई सरकारले विपद् संकटग्रस्त क्षेत्र घोषणा गरेको छ। त्यसपछि प्रभावित क्षेत्रमा राहत, उद्धार तथा पुनःस्थापनाका कामलाई प्रभावकारी बनाउने विषयमा सरकारको ध्यान केन्द्रित हुँदै आएको छ।
प्रधानमन्त्री शाहसँगको छलफलमा स्थानीय तहका प्रमुख तथा जनप्रतिनिधिहरूले प्रभावित क्षेत्रमा देखिएका समस्या, तत्काल आवश्यक पर्ने राहत तथा पुनःनिर्माणका प्राथमिकता र दीर्घकालीन पुनरुत्थानका विषयमा सुझाव तथा जानकारी प्रस्तुत गर्ने अपेक्षा गरिएको छ।
प्रतिक्रिया