काठमाडौं । मेडिकल व्यवसायी दुर्गा प्रसाईं झापाबाट काठमाडौं फर्किने क्रममा सोमबार त्रिभुवन अन्तर्राष्ट्रिय विमानस्थलमा प्रहरीसँग तनाब उत्पन्न भएको छ । विमानस्थल परिसरमा समर्थक तथा सञ्चारकर्मीलाई सम्बोधन गर्न खोजेपछि प्रहरीले उनलाई कार्यक्रम गर्न नदिँदा तनाब उत्पन्न भएको हो । प्रहरीले उनलाई घर पठाएको हो ।
भद्रपुरबाट काठमाडौं आएको विमानमार्फत दिउँसो त्रिभुवन विमानस्थल पुगेका प्रसाईंको प्रतीक्षामा विमानस्थल बाहिर केही युट्युबर तथा समर्थकहरू जम्मा भएका थिए । प्रसाईंले विमानस्थल परिसरमै सञ्चारकर्मीलाई ‘बाइट’ दिन खोजेपछि प्रहरीले उनलाई त्यहाँ कुनै कार्यक्रम वा सम्बोधन गर्न नमिल्ने भन्दै रोक लगाएको थियो ।
प्रहरीले रोक लगाएपछि उनका समर्थकहरूले प्रधानमन्त्री बालेन्द्र शाह र गृहमन्त्री सुदन गुरुङविरुद्ध उत्तेजक नाराबाजी गर्दै सरकार तथा प्रहरीप्रति आक्रोश व्यक्त गरेका थिए ।
त्यसक्रममा प्रसाईंले संसद् भवन तथा सिंहदरबारमा तोडफोड र आगजनीका घटना हुँदा प्रहरीको भूमिकामाथि समेत प्रश्न उठाएका थिए ।
प्रतिक्रिया