कांग्रेसको १५औँ महाधिवेशन प्रक्रिया आजदेखि, वडा अधिवेशन हुँदै

काठमाडौं । नेपाली कांग्रेसको १५ औँ केन्द्रीय महाधिवेशन प्रक्रिया आजदेखि सुरु हुँदैछ । कांग्रेस केन्द्रीय निर्वाचन समितिका अनुसार आज र भोलि देशभर वडा अधिवेशन हुनेछ ।

वडा अधिवेशनबाट सभापति, एक महिलासहित दुई उपसभापति, एक सचिव र एक सहसचिव निर्वाचित हुनेछन् । कांग्रेसको विधानअनुसार वडा सभापतिलाई वडासदस्य मनोनयन गर्ने अधिकारसमेत दिइएको छ ।

जसअनुसार गाउँपालिकाका वडा सभापतिले पाँच, नगरपालिका तथा उपमहानगरपालिकाका वडा सभापतिले छ र महानगरपालिकाका वडा सभापतिले सात जना वडासदस्य मनोनयन गर्न पाउने व्यवस्था छ ।

वडा समितिमा एकतिहाइ सदस्य अनिवार्य रूपमा महिला हुनुपर्ने व्यवस्था गरिएको छ । विधानमा समावेशी सिद्धान्तअनुसार सबै समुदायको प्रतिनिधित्व सुनिश्चित गर्नुपर्ने तथा अल्पसङ्ख्यक, अपाङ्गता भएका व्यक्ति र युवाको प्रतिनिधित्वलाई समेत ध्यान दिँदै क्रियाशील सदस्यमध्येबाट वडासदस्य मनोनयन गर्नुपर्ने व्यवस्था छ ।

गाउँ, नगर, उपमहानगर र महानगरपालिकाका वडा अधिवेशनबाट क्षेत्रीय अधिवेशनका लागि प्रतिनिधिसमेत चयन हुनेछन् ।

कांग्रेसको महाधिवेशन कार्यतालिकाअनुसार वडा र पालिका अधिवेशन सम्पन्न भएपछि असोज ७ गते जिल्ला अधिवेशन र असोज १० गते प्रदेश अधिवेशन हुनेछ ।

त्यसपछि असोज १६ देखि १९ गतेसम्म काठमाडौंमा कांग्रेसको १५औँ केन्द्रीय महाधिवेशन आयोजना हुनेछ ।