बारा । बाराको जीतपुरसिमरा उपमहानगरपालिका–२ सिमरास्थित एक होटलमा चक्कु प्रहारबाट एक युवकको मृत्यु भएको छ। शनिबार साँझ करिब ५ बजे सम्झना स्टाफ होटलमा भएको घटनामा स्थानीय ३५ वर्षीय शेरबहादुर खड्काको मृत्यु भएको हो।
प्रहरीका अनुसार खाजा खान होटल पुगेका केही व्यक्तिहरूबीच विवाद भएपछि घटना भएको प्रारम्भिक अनुसन्धानबाट खुलेको छ। विवादका क्रममा होटलको भान्सामा रहेको धारिलो चक्कु खड्काको घाँटीमा प्रहार गरिएको बताइएको छ।
चक्कु प्रहारबाट गम्भीर घाइते भएका खड्कालाई तत्काल उपचारका लागि वीरगञ्जस्थित अस्पताल लगिएको थियो। तर, अस्पताल पुर्याएलगत्तै चिकित्सकले उनलाई मृत घोषणा गरेका थिए।
घटनामा संलग्न व्यक्ति फरार रहेको इलाका प्रहरी कार्यालय सिमराका प्रमुख डीएसपी दयाकृष्ण भट्टले जानकारी दिए। प्रहरीले फरार व्यक्तिको खोजीका साथै घटनाको कारण र संलग्नताबारे थप अनुसन्धान गरिरहेको जनाएको छ।
प्रतिक्रिया