बुटवल । पवन मिष्ठान भण्डारले बुटवलबाट पुनः आफ्नो सेवा सञ्चालनमा ल्याएको छ । बुटवलको अमरपथमा आउटलेट सञ्चालन गर्दै आएको भण्डारले पार्किङको समस्याका कारण सेवा स्थगित गरेपछि अब बुटवल-१०, कालिकानगरबाट सेवा सुरु गरेको हो ।
भण्डारका सञ्चालक पवन हलुवाईले घटस्थापनाको दिनदेखि कालिकानगरबाट सेवा सञ्चालन गरिएको जानकारी दिए । बुटवल क्षेत्रका ग्राहकको माया, विश्वास र सद्भावका कारण पुनः बुटवलबाटै सेवा सुरु गरेको उनले बताए ।
विसं २०२५ मा उनका बुवाको नेतृत्वमा स्थापना भएको पवन मिष्ठान भण्डारले पेडा, लड्डु, परबल मिठाई, दूध मिठाईलगायत २५ प्रकारका मिठाई उत्पादन गर्दै आएको छ । भण्डारका अनुसार यहाँ दैनिक करिब एक हजार लिटर दूध र सात क्विन्टल खोवा खपत हुने गरेको छ ।
भण्डारमा हाल ८० जनाले प्रत्यक्ष रोजगारी पाएका छन् । साथै, तीन सयभन्दा बढी स्थानीय किसानबाट प्रत्यक्ष रूपमा दूध खरिद गर्दै आएको सञ्चालक हलुवाईले बताए ।
उनका अनुसार अमरपथमा विसं २०५५ मा आउटलेट सञ्चालनमा ल्याइएको थियो । तर, पछिल्लो समय पार्किङको समस्या बढ्दै गएपछि ग्राहकलाई सवारीसाधन राख्न असहज भएको थियो । त्यसैले अमरपथस्थित आउटलेटको सेवा स्थगित गरी कालिकानगरबाट पुनः सेवा सुरु गरिएको उनले बताए ।
कोभिड-१९ महामारी, भूकम्प, बजार बन्द तथा विभिन्न आन्दोलनका कारण व्यवसाय प्रभावित भए पनि गुणस्तरीय उत्पादन र सेवामा सम्झौता नगरेको भण्डारले जनाएको छ ।
पछिल्लो समय काठमाडौंलगायत विभिन्न स्थानमा पवन मिष्ठान भण्डारका उत्पादन तथा पवनको पेडा बिक्री भइरहेको भए पनि बुटवलबाहेक अन्य स्थानमा आफ्नै आउटलेट नरहेको भण्डारले विज्ञप्तिमार्फत स्पष्ट पारेको छ ।
सञ्चालक हलुवाईले ग्राहकको विश्वास र मायालाई प्राथमिकतामा राख्दै आगामी दिनमा पनि गुणस्तरीय मिठाई तथा दुग्धजन्य उत्पादन उपलब्ध गराउने प्रतिबद्धता व्यक्त गरेका छन् ।
प्रतिक्रिया