बुटवल । स्थानीय निर्वाचन नजिकिँदै जाँदा विभिन्न राजनीतिक दल तथा सम्भावित उम्मेदवारहरूले उम्मेदवारी घोषणा गर्ने क्रम बढ्दै गएको छ । यसैक्रममा बुटवल उपमहानगरपालिकाको सबैभन्दा ठूलो वडा मानिने वडा नम्बर-११ को वडाध्यक्ष पदमा राष्ट्रिय स्वतन्त्र पार्टी (रास्वपा) बाट सुनिल शाहीले उम्मेदवारी घोषणा गरेका छन् ।
शाहीले सामाजिक सञ्जालमार्फत आफ्नो उम्मेदवारी सार्वजनिक गर्दै आगामी स्थानीय निर्वाचनमा वडा नम्बर-११ को नेतृत्वका लागि प्रतिस्पर्धा गर्ने घोषणा गरेका हुन् ।
यसपटक रास्वपाले उम्मेदवारको पहिचान, दाबेदारी तथा सार्वजनिक प्रस्तुतिलाई व्यवस्थित बनाउन ‘क्यान्डिडेट क्लब’ को अवधारणा अघि सारेको छ । पार्टीले यसमार्फत उम्मेदवार बन्न इच्छुक व्यक्तिहरूलाई आफ्नो उम्मेदवारी सार्वजनिक गर्ने, व्यक्तिगत परिचय प्रस्तुत गर्ने तथा विचार र योजना नागरिकसमक्ष राख्ने अवसर प्रदान गर्ने अभ्यास सुरु गरेको हो ।
क्यान्डिडेट क्लबलाई परम्परागत राजनीतिक अभ्यासभन्दा फरक रूपमा सम्भावित उम्मेदवारहरूको सार्वजनिक परिचय, सहभागिता र संवादको माध्यमका रूपमा लिइएको छ । यसमार्फत उम्मेदवारहरूले पार्टीभित्रको दाबेदारीमा मात्रै सीमित नभई नागरिकसमक्ष आफ्नो सोच, क्षमता, अनुभव र आगामी कार्ययोजना प्रस्तुत गर्न सक्नेछन् ।
यस अभ्यासले उम्मेदवार छनोट प्रक्रियामा पारदर्शिता, प्रतिस्पर्धा र नागरिकको चासो बढाउन सहयोग पुग्ने अपेक्षा गरिएको छ । साथै, उम्मेदवारहरूले निर्वाचनअघि नै आफूले प्रतिनिधित्व गर्न खोजेको क्षेत्रका समस्या, आवश्यकता र सम्भावित समाधानबारे आफ्नो धारणा सार्वजनिक गर्ने अवसरसमेत पाउनेछन् ।
बुटवल-११ क्षेत्रफल र जनसंख्याका दृष्टिले उपमहानगरपालिकाकै ठूलो वडा भएकाले यहाँको नेतृत्व चयनलाई विशेष चासोका साथ हेरिएको छ । तीव्र सहरीकरण र बढ्दो जनघनत्वसँगै सडक तथा पूर्वाधार व्यवस्थापन, खानेपानी, ढल निकास, फोहोरमैला व्यवस्थापन, सार्वजनिक सेवा प्रवाह र सुशासन यस क्षेत्रका प्रमुख स्थानीय सवालका रूपमा रहेका छन् ।
प्रतिक्रिया