काठमाडौं । काठमाडौं । चिनियाँ राष्ट्रिय जनकंग्रेसका अध्यक्ष ली चाङ्सु काठमाडौं आइपुगेका छन् ।
विशेष विमानबाट आएका अध्यक्ष ली केहीबेरअघि त्रिभुवन विमानस्थलमा अवतरण गरेका हुन् । । लीलाई स्वागत गर्न सभामुख अग्निप्रसाद सापकोटा, संसद सचिवालय र परराष्ट्र मन्त्रालयका अधिकारीहरु एवं चिनियाँ दूतावासका अधिकारीहरु विमानस्थलमा पुगेका छन् ।
चार दिने नेपाल भ्रमणको क्रममा आएका ली र नेपाली समकक्षी अग्निप्रसाद सापकोटाले नेपाल र चीनको संसदबीच संसदीय सहकार्यसम्बन्धी सम्झौतामा हस्ताक्षर गर्ने बताइएको छ ।
अध्यक्ष ली विमानस्थलबाट सोझै सोल्टी होटल जानेछन् । उनी बस्ने प्रबन्ध सोही होटलमा मिलाइएको छ । सोल्टीबाट उनी सभामुख सापकोटासँग शिष्टाचार भेटवार्ता गर्न संसद भवन नयाँ वानेश्वर आउनेछन् । त्यसक्रममा सबै दलका प्रमुख सचेतक, सचेतक र नेपाल चीन मैत्री संसदीय समहुका सदस्यहरु उपस्थित हुनेछन् ।
सभामुख सापकोटाले अध्यक्ष लीको सम्मानमा सोल्टी होटलमा रात्रिभोजको आयोजना गरेका छन् ।
लीले भोलि मंगलबारबिहान सवा ९ बजे राष्ट्रियसभाका अध्यक्ष गणेश तिमिल्सेनासँग संसद् भवनमै भेटवार्ता गर्नेछन् । त्यसपछि बिहान १० बजे एमाले अध्यक्ष केपी शर्मा ओलीसँग र पौने ११ बजे माओवादी अध्यक्ष पुष्पकमल दाहाल प्रचण्डसँग भेटवार्ता गर्नेछन् ।
त्यहाँबाट होटलमा पुगेपछि खाना खानेछन् भने त्यसपछि परराष्ट्र मन्त्री नारायण खड्कासँग भेटवार्ता गर्ने कार्यक्रम रहेको छ ।
अध्यक्ष लीले दिउँसो बालुवाटारमा प्रधानमन्त्री देउवालाई शिष्टाचराा भेटका लागि जानेछन् भने अपरान्ह राष्ट्रपति विद्यादेवी भण्डारीसँग शिष्टाचार भेटवार्ता गर्नेछन् ।
अध्यक्ष ली बिहीबार बिहान चीन फर्कने कार्यक्रम रहेको छ ।
चिनियाँ कम्युनिष्ट पार्टीको तेस्रो वरियताक्रममा रहेका अध्यक्ष लीको सुरक्षाको लागि नेपाली सेनाको कर्णेलको नेतृत्वमा सुरक्षाकर्मी परिचालन गरिएको छ ।
प्रतिक्रिया