काठमाडौं । पाकिस्तानका लागि नेपाली राजदूत सैयद हैदर शाहले उपराष्ट्रपति नन्दबहादुर पुनसँग बिदाईभेट गरेका छन् ।
राजदूत हैदर शाहले बुधबार उपराष्ट्रपतिलाई भेट गरेका हुन् । भेटमा दुई देशबीचको आपसी हितका विषयमा समेत छलफल भएको थियो ।
त्यसक्रममा उपराष्ट्रपति पुनले पाकिस्तानमा चिकित्सा र प्राविधिक शिक्षाको क्षेत्रमा नेपाली विद्यार्थीहरूको शिक्षाका लागि पाकिस्तानले गरेको उदार सहयोगको प्रशंसा गरे । पुनले कोभिड–१९ को महामारीका बेला नेपाललाई स्वास्थ्य सहायता उपलब्ध गराउन राजदूत शाहको सक्रिय भूमिका र पहलको पनि प्रशंसा गरे ।
राजदूत हैदर शाहले नेपाल सरकारले पाकिस्तानमा बाढीपीडितका लागि पठाएको राहत सामग्रीका लागि उपराष्ट्रपति पुनलाई धन्यवाद दिँदै समयमै सहयोग गरेकोमा हार्दिक आभार व्यक्त गरे ।
आफ्नो कार्यकालभर पाकिस्तानी दूतावासलाई निरन्तर सहयोग गरेकोमा उनले पुनप्रति कृतज्ञता व्यक्त गरे। उनले सन् २०२२ मा पाकिस्तानको राष्ट्रिय र स्वतन्त्रता दिवसको स्वागत समारोहमा उपराष्ट्रपतिको प्रमुख अतिथिको रूपमा उपस्थित भएको कुरा पनि स्मरण गरे ।
भेटमा उपराष्ट्रपति पुनले राजदूतलाई नेपाली ढाका टोपी र खादाले सम्मान गरेका थिए ।
प्रतिक्रिया