काठमाडौं । निर्वाचन आयोगले नेकपा एकीकृत समाजवादीका अध्यक्ष माधवकुमार नेपाललाई कारवाही गर्न रौतहट प्रहरीलाई निर्देशन दिएको छ ।
मतदातालाई झुठो आश्वासन बाँढेर आचार संहिता विपरित कार्य गरेको भनि परेको उजुरीमाथि नेपालको तर्फबाट स्पष्टीकरण प्राप्त नहुँदै आयोगले रौतहट प्रहरीलाई पत्र पठाएर आवश्यक कारवाही गर्न निर्देशन दिएको हो ।
आयोगले नेपाल विरुद्ध निर्वाचन (कसूर तथा सजाय) ऐन, २०७३ को दफा ३९ बमोजिम आवश्यक कारबाही प्रक्रिया अगाडि बढाउन जिल्ला प्रहरी कार्यालय रौतहटलाई अनुरोधसहित पत्र लेखेको छ ।
हालै रौतहटमा आयोजित एक कार्यक्रममा मतदातालाई प्रभावित पार्न फ्रि भिसा र फ्रि टिकट दिने भनेको श्रव्यदृश्य सामाग्री नेपालको नभएको भन्ने आधार नभएको भन्दै आयोगले स्पष्टीकरण सोधेको थियो ।
रौतहटमा आयोजित कार्यक्रममा अध्यक्ष नेपालले ‘बिना ढेउवा के भिसा मिल्ते है, टिकट मिल्ते है, काठमाडौंमे तालिम मिल्ते है भनी दिएको वक्तव्य सामाजिक सञ्जालमा सार्वजनिक भएको र यस विषयमा आफ्नो गम्भीर ध्यानाकर्षण भएको आयोगमा पत्रमा उल्लेख छ ।
सोहीअनुसार आयोगले कारबाही प्रक्रिया अगाडि बढाउन पनिे रौतहट प्रहरीलाई पत्राचार गरेको हो ।
आयोगले बिहीबारमात्रै नेपाललाई समेत स्पष्टीकरण पठाएको छ । तर, सुनुवाईको मौका नदिइकन आयोगले नेपालमाथि कारवाही प्रक्रिया समेत अघि बढाएको छ । नेपाललाई २४ घण्टाभित्र स्पष्टीकरण पेश गर्न भने पनि समानान्तर रुपमा रौतहट प्रहरीलाई समेत आजै पत्र पठाएर नेपाल विरुद्ध कारवाही प्रक्रिया अघि बढाउन आयोगले निर्देशन दिएको छ ।
निर्वाचन (कसूर तथा सजाय) ऐन, २०७३ को दफा २० को उपदफा (४) को खण्ड (च) मा मतदातालाई कुनै किसिमले लोभ लालच देखाउन वा आर्थिक प्रलोभन देखाउन नहुने व्यवस्था छ । ऐनको दफा २० को उपदफा (४) उपदफा (१) को खण्ड (च) विपरीतको कार्य गर्ने व्यक्तिलाई एक लाख रुपैयाँसम्म जरिवाना वा र २ वर्षसम्म कैद वा दुवै सजाय हुने व्यवस्था निर्वाचन ऐनमा रहेको छ ।
प्रतिक्रिया